[عمر ال شيبي]

هلا بالطير يوم انّه تِعلّا = يشوف الناس بعيون الصقاره
ونا من حيل روحي ما تفلّا = لجيت الشوق مطرب لي سهاره
الا يا طير قلبي وين حلّا = ترقم كيف ما جتك العباره
لجل ظبين يسل الوجد سلّا = اذا ما شفته بحول المحاره
يذوب الشهد من حله وحلّا = كحل بالعين مرسوم المساره
فتني وراح ما منه يخلّا =ربيع العود من نوره مناره
يهز اللي يناظره ِ بْتِملا = ساْعات اطوال وعيونه تباره
ابو حملين قبن فوق تلاّ = يجيب التوه لو يرمس جهاره
طلبتك حل من عندك تغلّا = وصد اليوم ما منه زياره
اروح اشكي لقاضي العشق ولّا =تجيب الحق من عندك اشاره
تراها بحظك الساع وْتِملّا = مِن عْيوني بريق الشمس ناره
وليل الليل يا كبدي تولّا = معاد النوم يحفل لي ستاره
سباب الود محسود المحلّا = عوازل سيف قاصم بالظهاره
وشيب الراس يدرج بالمِدلّا = غريب الروح ما رد اعتباره
الا ياطير هات الحل حلا = تفك ارباط قلبن به مراره