أعزائي رواد هذا المنتدى الشامخ أضع بين أيديكم هذه القصيده لعلها تنال استحسانكم
الكلمة اللي وقعها مثل السهم=ياليتها على ولاها طايره
بين الحنايا تلتهب مثل الحمم=ماهي بلا زينه ولاهي سايره
خليتها حسب العوايد والقيم=وأنا رجل ولا التفت للبايره
يبقى عزيز القوم ويروح الألم=وتهدى الجموع اللي بصدري ثايره
الرجل لو بيتبع سقاط الكلم=مكاسبه راحت بها خسايره
ماكل من مر اللغم ثار اللغم=ماثوره كود الحمول الجايره
أحياناً اسمع وانصقه مثل الأصم=حتى تعداني لها في عايره
ماهو مهم اردها بس الأهم=إني ماثوّر في خويي ثايره
وإن عادها عز الله إنه ماسلم=ليه لسانٍ تلتهب شفايره
اسوقها يمه ولا الحقها ندم=لو جت على سفك الدمي الفايره
انا لساني لا خلا ولا عدم=يذود ذود الحر عن عشايره
احيان لو جيت الجمه ماينلجم=حر يصارع له جموٍعٍ غايره
غارة جموعٍ ماتدور للبهم=تبغى بكارٍ فيها الانفس حايره
ارداهن اللي ماتثور من الشحم=واطيبهن اللي مثل ضلع الصايره
غاروا قبل مالطير يصدح بالنغم=والصبح توه ماكشف ستايره
ووقف لهم وقفه على ساق وقدم=ساقٍ عسى ماتنحزم جبايره
ماراح حقه يوم جوه ولا انهزم=ولا اكسبوا غيرالطعون الغايره
يضرب صياصيهم وسيفه مانثلم=دارت عليهم والدواير دايره
شهر بسيفه فوق وانكف وابتسم=كن الاعادي حلم ليلٍ زايره
يعني ولا اطلق شنب بين الامم=يبيح مكنونه ولا سرايره
هذا الشجاع اللي ليا منه احتدم=لو ينعمي ماتنعمي بصايره
وانا لساني لا خلا ولا عدم=يذود ذوده لا سمعت البايره
نشمي حامد المويعزي