ثابت وصادق ما يغيرني الوقت=وإذا تغيرنا تغير للأفضل
بس الخطأ مرضاه ابد منك لأهنت=وأكيد من غيرك ابد فيه مقبل
قول الصراحة كان من ودنا عفت=قلي بلا تجريح يا محمد ارحل
على المحبة ما جبرناك يا بنت=أنته بنفسك جيت للود تحمل
واليوم أشوفك يا غناتي تكبرت=وتمر من جنبي ولا فيك تسال
غيري بدنيا الحب معلوم حصلت=وغرك كلامه يوم قال أنته أجمل
صحيح أنا حبيت وأعطيت وأخلصت=ومن عينك النجلا ترى كنت بخجل
ولا يوم معكم يا أريش العين قصرت=ومنكم كثير الهم كنت أتحمل
وحطيتكم وسط النواظر وغمضت=وفتحت صدري لك وقلنا تفضل
وسهرت ليلٍ مظلمٍ وأنتِ أبه نمت=ساهر على جمرة غلاك أتململ
وما دام يا سيد الغنادير قررت=ترحل وتتركني وبالوصل تبخل
الله معك ما دامها يا الغلا جت=منكم وكل شيء في حياتك تبدل
لكن إلي عندك رجاء لو تكرمت=وقفه على الأطلال فيها تأمل
ولو كان خانتك المدامع وهلت=اسق الورد بدمعتك قبل تذبل
ولو جاتك أخباري وقالوا لكم مت=اطلب لي الرحمة ولا بيك تزعل
ولو عشت في الدنيا وبالرجل سيرت= حبك بقلبي ثابتٍ ما تبدل
هذي حقيقة شامخة لو تنكرت=تفضح مشاعر من هواكم تغربل
أنت الأمل وأنت الغلا وين ما رحت=وأنت غرامٍ في خفوقي تغلغل
بقلم "محمد السواط"