السلام عليكم ورحمة الله وبركاته
أعتذر عن الغياب وسأحاول ان اعوض التقصير بقدر الامكان ...
قصيدة اتمنى ان ترقى للذائقة العاليه هنا ...
لا تمسح الدمعة إذا طال ما طال = دام الفكر يبكي ودمعه دليله
خل الفرح يكثر على عشق الاموال = وإترك خفوقه سارحٍ بالرذيله
لا صارت الفله على كف طبال = إرقص لها رقصه وعينك ذليله
الوقت يطلبنا مغاوير ورجال = وحنّا نقدم له دمار وفشيله
القدس نبكيها على أوتار موال = وأفعالنا فيها نوادر قليله
يا هيه لا يكثر ترى حيلكم مال = نحتاج للتعديل مده طويله
يا مقبرة (غزة) بطن رملك أبطال = أنفس جليلة في مراتب جليله
في مثلهم نضرب على الناس أمثال = أرواحهم فدوه وما هي بخيله
يا حيف دامك ترتوي من هَنَا الحال = غيرك ما شاف النوم ليله وليله
الشام تصرخ وين بانين الاجيال = والقائد يدمر قبيله , قبيله
يا فاقد الذمه ويا ضيّق البال = ويا عاري الهمه بشلة ضليله
تقتل عيال الناس من شان أقوال = تفرض على شعبك مراره عليله
لا تحسب إنك فوق والناس أرذال = ( يمكن أشوفك يوم بايع بليله )
وإن كان حراسك زحازيح وجبال = ما هم من الجبار حامين حيله
الله كبير وقادرٍ فيك يا ضال = إصبر ترى حكمك قريبٍ رحيله
العين لو تدمع من الجال للجال = ما حركت ساكن وترمش كليله
ضاقت بي البارح مَشَاهد وأحوال = صورتها فكره وقافٍ عديله
شاركت بأبياتي على بُعد أميال = والقرب أصبح حاجةٍ مستحيله
ما تفرق الدمعة إذا صارت أغلال = وما يعرف المغلول من هو غليله
بعيوننا شفنا من الواقع أمثال =وبقلوبنا عِزه تهاوت ضئيله
هذا كلامي داخله ضيم وأهوال = الله يفرجها على غير طيله
وسلامتكم