يابهجة الأفراح طال انتظارك = لا شك لحظات انتظارك صعيبه
بنيت في جوفي مشاريف دارك = و ابطيت ما زرت الديار الكئيبه
ايام عمري تحتريك بجوارك = يوم التلاقي معك طوّل مغيبه
ارسم مساري في رجاوي مسارك = و تضيع خطواتي ولو هي قريبه
تتبخّـر أحلامي بغبة بحارك = و تمطر علي امآل روحي مخيبه
أحلام ليلي تايهات بنهارك = و اشوف دورات الليالي عجيبه
و العمر يمضي ولا قطفنا ثمارك = يا حسرة اللي كان مثلي نصيبه
ترمي به الأقدار في وسط نارك = و في داخل المسكين نارٍ لهيبه
متى على الله يوم معك نتشارك = و نسدد ارسوم المآسي ضريبه
و من غربة الايام ينفض غبارك = و ننهي فصول مغامراتٍ غريبه