[هاوي نجد]

انعد السنه بيامها والليالي السود = وسنين العمر تمضي وحن نفتكر فيها
على الله شكينا ثم على ماكر اهل الجود = سعيد(ن)ولد ذيبان يفهم مغازيها
ابي تفتكر في جادل(ن) تفتن المقرود = وراعي الكرامه مقفين مشتقى فيها
عليهاجمال(ن)في جمال(ن)عليه شهود = وعشاشيقها ياكثرهم في حراويها
ترا من عشقها تفتنه بالهنا والزود = وهي نقص في نقص(ن)خسر من يهاويها
وعندي نصيحه قلتها والهجوس حشود = تجارب زمان(ن)والحكم في معانيها
حافظ على دينك ترا الوقت نقص وزود = وصيور كل انسان داره مخليها
وحاول ترد الدين يللي خذيت الزود = جمايل اثنينً لوتبي منت محصيها
ولاتشتحن للرزق رزقك على المعبود = ولاتشتقي في سلعة الناس تبغيها
ولاتهين نفسك ياولد تاليتك الدود = ولاتفعل الجادات في غير راعيها
ولاتيدي الغايه الّخبل(ن)قريب سدود = مع الوقت تلقى الّخبل للناس مفشيها
ولاتناسب اللي للمواجيب جاه الكود =فتخسر عيالك والبلا من عوانيها
لونست من وقتك وعينت منه اللهود = فلاتشتكي للناس تكثر حكاويها
ترا الصبر مهما صار تلقى وراه الفود = وحياة(ن)بليا صبر تكثر بلاويها