[عبدالله الشويمان]

السلام عليكم ورحمة الله وبركاته..

بالملتقاء الرابع لأهالي محافظة المذنب.المتواجدين في مدينة الرياض.
والذي أقيم يوم الخميس ليلة الجمعه في 28/12/1432 هـ.بقاعة المنصه.
تشرف بالقاء القصيدة التاليه بتلك المناسبه..اتمنى ان تلاقي الاستحسان من القراء الكرام.

يا موحدين الله بذكرٍ وتهليل=جمع العباد اللي عن الشرك تنها
مني سلام الله عليكم كما السيل=بايام وسمٍ وافياتٍ مزنها
ويا ذالشيوخ ويا الشباب الحلاحيل=يا ذالنفوس اللي تشرف وطنها
ابيات شعري من هجوسي معاجيل=تكفلت نفسي وهزت رسنها
بلزها بمضمار الاشعار كالخيل=لعلها كل النفوس تحضنها
وأفخر أنا لا جبتها ما بها ميل=عن ديرةٍ عندي يشرف علنها
الديره اللي فيها أهلنا منازيل=فيحان واطرب ان تكلمت عنها
من الجنوب إيحدها السر تفصيل=ومن الشمال الهشمه الحد منها
منها نفودٍ شرق ومن غرب تشكيل=إعروق حمرن كملت في بدنها
قالت عقب شقواتها بالمحاحيل=لا للسواني اللي تعدى زمنها
ترثي الشقا وانتعشت بكل تجميل=في حكم أل سعود فارق شجنها
فيها التطور بان من دون تمهيل=كلٍ يراه الزاير ومن قطنها
لبست حلي وصارت اليوم للجيل=بنتن تبسم مايقه في حسنها
الله عليها والحدايق مظاليل=فيها حمام الورق يطرب لحنها
الحمد لله والشكر والتهاليل=باعداد حي الناس وما باد منها
انتم لها يا اهل العقول القناديل=يا ذخر للديره وللي سكنها
من اجلها تتجاوزون العراقيل=إلى دعتكم ما تخلَّون عنها
انتم اهلها يا اهل البن والهيل=الضيف ان جاكم هناته ضمنها
والشيخ ابراهيم العبودي وفاء الكيل=ابو علي جل المكارم فطنها
وفَّا وكفَّا ونشكره شكر بالحيل=شوفوا المنصه في ضيوفه شحنها
يا طيب والله كل حاضر بهالليل=نفسه لأجل حبل التواصل رهنها
وختم القصيده هللو يا الرجاجيل=يا ذخر للديره وللي سكنها

عبدالله الشويمان-الرعد