[نشمي المويعزي]

أعزائي رواد هذا المنتدى العريق أسعد الله أوقاتكم بكل خير اعتذر لكم عن هذا الغياب وأطرح لكم هذه الابيات لعلها تنال شيء من استحسانكم

لذة العمر يوم ولذة اليوم ساعه=بالسنين القديمه والسنين الجديده
خير مافي حياتك صيت طيب وطاعه=لا مشاهد قناه ولا تصفح جريده
الزمن لو ضحك يضحك عليك بلكاعه=وانت تضحك ولا تدري عن اللي يريده
مابه إنسانٍ إلا واغبر الوقت لاعه=لين يجزا من أيام الزمان الزهيده
ماتشوف المصايب لين يكشف قناعه=وإن تلقاك وجهه شفت فيه النكيده
وإن قفيته سحبك وعشت نشوة ضياعه=وإن تقفاك قفى بك على القبر سيده
من وثق به غدر به قبل يجني متاعه=كم زرع به بشر وأقفى وخلاّ حصيده
نطرد أحلامنا والعمر يطوي شراعه=والعمر مثل طيرٍ مادرى من يصيده
والليالي تعلم دون كرسي وقاعه=وأغلب دروسها للي يتابع مفيده
والبشر كلهم من بعد سن الرضاعه=ياخذون الدروس وجامعتهم وحيده
قسم واحد مهي بأقسام طب وزراعه=لا تخصص لغات ولا تخصص عقيده
تعطي دروس مختلفه بفن وبراعه=من فهمها فهمها والبليده بليده