[حرف وشعر]

ياتايهن بين الوهم والحقيقة= ضيعت عمرك بالامل والتسويف
ماتدرى ان العمر كلة دقيقة= لا فات عنّك مانفعك التحسيف
وماتدري ان الموت لاجات ضيقة= مايمهلك لحضة ولو قلت ياحيف
عجل وبادر بالاعمال الوثيقة=وخل الهوا واترك الغى والزيف
الموت حق (ن) لاحشا مانطيقة= والموت جد(ن) مايعرف السواليف
والموت لابد ما نسلك طريقة=ولابد من ساعة الصفر ياسيف
ولا حان وقتك وابهشتك الحقيقة=وحطوك فى نعش(ن) علية الشراشيف
ثم ادرجوك بحفرة(ن) هى عميقة=والكل يبكى من عيون(ن) مذاريف
وصفوا على قبرك جنادل صفيقة=وهالوا عليك الترب من رملة الريف
وراح الصديق اللى يعزى صديقة=فى منزل(ن) مابه عن الحر تكييف
غير العمل واخلاص نفس(ن) رقيقة= ثم رحمة اللى فوق عرشة بلا كيف