[عبدالمحسن الرحمه]

بسم الله الرحمن الرحيم

بعد الفجر جالس على شطها الهادي=سكونه اللي يروي أزهار وردية
نور الغلا نورة على شطها زادي-=من قدها نالت تواصيف حصرية
لو أشرت يم القمر جاك منقادي=في ليلته كلّ الخجل فيه مقرية
يا زهرة النرجس على ضفة الوادي=يضلها مزن الغلا كل عصرية
ياريحة العنبر ويا ريحة الكادي=بارسلكم من خافي الشوق برقية
النفس عافت مالها شف بالزادي=أصبحت مع درب المحبين طرقية
أنتي بقلبي يا هوى البال ومرادي=ناحت لك أشواقي مثل نوح قمرية
عز الله أني من هوى الزين منصادي=كن الحشا يطعن بطعنات شبرية
جريت لك ياغلا الغلا حلو الأنشادي=حاوي جمال الصوت وابيات منقية
من حسنها ملقى لها شبه ببلادي=الله عليها فاقت أوصاف شامية
أثر الدلع ميزة بها والدلع بادي=والروح يا عمري لكم دوم مهدية
غمزة بخده والحلا فيه ينشادي=والشعر يبهر مدعي الروح مطوية
والخد برّاق ٍ سبق صوت رعادي=و الخشم كنه سلت اسيوف هندية
والعين حوراء زانها رب العبادي=ورموشها صفت جيوش ٍ سعودية
حبه بقلبي يا هلي دوم ينعادي=ينعش خفا روح ٍ من الهم مبرية
لأجن ليلي جاني الشوق جلادي=كن الحشا يقصف بغارات جوية
مسكين قلبي من غلا الريم معتادي=زهرة غلاها داخل الجوف مسقية
من زود حبة ما اهتني دوم برقادي=أحس كبدي من بلا الشوق مشوية
أخشا عليها يا هلي شر حسادي=شر النفوس اللي عن الحق معمية