الالف اولف والمدا من دمائي = ماهو من حروف الشعر والهجائي
ألفيةٍ فيها دوائي ودائي=على عشيري سيد كل الخوندات
اللي ملك كلّي مهو بعض الأشياء=معزّته تجري من الألف للياء
إن غاب عنّي ياصل الروح بإيحاء=اليا ضحك بشّيت وآحس الآهات
الباء بليت بحب خير الرعابيب=ما مثلها بين العرب والاجانيب
تجمعت فيها وصوف وأعجايب=ما والله انها من عموم السلالات
يا عنق ريم وعاتق ٍ مال مسلوب=وعين الظّبي ليل ٍ بها سهيل مسحوب
يبرق سناها لكل طالب ومطلوب=أسيح فيها أعوام ما افوق لحظات
التاء تقل حورا من جنان فرت=على ديار الخالدي يوم مرت
لكنها في بسرة القلب قرت=غنجا يغارن من حلاها الاميرات
مثل الحرير بملمسه وإن تلوّت=نادت معاليقي وقلبي وصوّت
لبيه يالي بحسنها نجوم ضوَّت=ريح الوليد وفي حياها عفيفات
الثاء ثمينة روح ذات المثلث=عن حبها ما والله ألقى معلث
لو تبتسم لسهيل قام يتعلّث=استاذن الله ثم نزل للصلاوات
أطهر من الماء لا جرا ما تريّث=والملح فيها بكل كلّي وعيّث
لا شفتها أنفاسي خيول ٍ تحيّث=تجري ونا ما أقوى المشي لو بخطوات
الجيم جاوبت الحمام السواجع =من حبها مابين رايح وراجع
يومٍ يطيب القلب وأيام واجع=عسى حشاها مرقد القلب لا مات
ذاك الحشا من الجوع شدّ وتدرّج=أسكب عليه الماء وأقوم آتفرّج
شلال للقاسي من الثّلج سرّج=عساه ماوى الخدّ لا نمت بسكات
الحاء حرام اني لي أعوام سارح=من حبها خاويت جنّي وجارح
يا ذا العقاب الي على الضلع بارح =خل الطويلة للهواوي مناجات
من حبّها العيلم له سنين ما شحّ =هدّاج للي غيرها ما ترشّح
الي غلاها في وفايا توشّح =بنت الملوك مطوّعين القويّات
الخاء خوا عظمي وقلبي معه خخ=من حبها مع فقدها قام يصرخ
حرٍّ من الفرقا عن فروخ يفرخ=وأتل قلبه تل شاص ٍ بعرقات
راع الهوا قلبه من البعد مشروخ=كل ما برا مشخ ٍ تجدد به مشوخ
هذا الهوا ما يعرف قروم وشيوخ=طوّح ببو زيد الهلالي براكات
الدال دنّوا قايد الريم لا صد=من قبل لا روحي الى الله تصعد
دنو حبيب الروح وأحيا ليا رد=اللي لعينه همت روس الطويلات
روس النوايف للهواوي موارد=لا حسّ في قلبه عجاج البوارد
في جوفه من اطلال الاشواق مارد=على حجارة ما تموت العلامات
الذا ذوى الجبار منهو تلذذ =بفراقها يذوى خفوقه يقذذ
دمه على الضلعين طشه يرذذ=اللي وذوني في هواها سنوات
وش ضرّهم والحبّ بالله لايذ=على النقا وعن الردى بي عوايذ
حاذت طيوب ومسكها كنت حايذ=الله يجزا من عذلنا بالأزمات
الراء رماح فراقها كالدياسر=بأقصى كنيني من يمينٍ وياسر
هذا هو الداء والدواء حيل عاسر=مامن بعد فرقى الولايف سلامات
حبل الرجاء لو ينقطع ما يسرّا=طاش اللباب من العقل ما يقِرّا
مخّ الهواوي لا انفجع ما يِدرا=يمسي مثل عقل الهواويِّ صنهات
الزاء زروع عيونها بي تلزز=ووصالها غيث وعليها معزز
عز الله انها في خفوقي تبزز=جورية بصافي دما القلب تقتات
العام كنّت بخير والعام ملزوز=زرنيخ في عرقي على القلب مدزوز
كنّ الفؤاد بقاعة الأرض محزوز=يوم إن عمرو الكلب جاب المطمّات
السين سنّ الله لها كل محسوس=كلي لها وكلي بها تقول ممسوس
عيلم خفوقي لكفها لوهو رسوس=تشرب صفاه لعينها عذب وفرات
العينها ضيقة خفوقي والأوناس=ون شفتها في باس عفت أقرب الناس
أشرب حَزَنها قْراح وآقول لا بآس=الله لنا عقب التشتت برحمات
الشين شمّاتي حيايا تحت خيش =يا جعلهم مثل النياشين للجيش
يا كثرهم , وليا بغيت أحدهم هيش=مبهم غناة أزوال ذيك الحديّات
جعل الذي نحّى وليفي لهبّاش=عشرة عوام مْغَيِّب بغرفة انعاش
لا عاش من فّرق وليفين لا عاش=تكسر عظامه بالحمول الثقيلات
الصّاد صدّ القلب عن كل مخصوص=إلا على صدير ٍ ليان ٍ ومرصوص
قبل أُخلق من الله بالقلب منصوص=ما غيرها من الغيد للروح مشهات
عنقا نحرها بالجواهر ترصص=لو شافها المفتي من الزين غصّص
الورك فيها من خصرها تفصص=منحوتة ٍ سبحان ربّ البريّات
الطاء طواني فراقها طيّة الخط =وطيّ الشنون الي منَ الماء تنقّط
وطيّ البحر جزره عقب مدّة الشّط=على التي من حزنها زرت الأموات
قلبي لخاطرها على الكف محطوط=ولو كان يرضيها بالامواس ممشوط
الا انها تُغبط ليا صرت مغبوط=ون ضقت ساعه جابت الضيق دمعات
الضاد ضمّوني على صدرها الغض=ضمّ الجنين اللي على الممتلي عضّ
مزّة نهدها لو بقلبي ميَة رضّ=تشفيه ما يدري بعدها بثورات
نابز نهدها بالبني ما يعوَّض =كل الحلا بأدنى حلاها يقوَّض
المخلديّة قبّة ٍ ما تروَّض =إلا لكفّي يوم في كفّي تبات
العين عين عناق عين أطيب البيع=حرّ ٍ قطع بحر العرب ماهو مطيع
أبيض مبه دقّه تقل غترة مذيع=مجلوب بمهاده لسوق الامارات
حرّة غلاها ميل ولغيرها باع=طفلة تمشّط بالجدايل تربّاع
يا حلوها ولعينها كل ما شاع =والي بصندوق ٍ عن الخلق ما هات
الغين غابت يوم حظي بها راغ=وقلبي تقل مجول تحت دقّ صوّاغ
يلهب عليه النار ويدق الأصباغ=حرّ المفارق حرّ والناس شمّات
قلبي من الفرقا بقطران مصبوغ=فيه الجروح تْفتّقت فايغه فُوْغْ
يا والله الي من خلاياه مفروغ=جمّرن وبيّ القاز ويّا الكريّات
الفا فهى في عيني الكون ما لف = كنّه بعدها شايخ ٍ أو تتلّف
همّي على رآسي بعدها تحلّف=وآشيب عيني يا سواد الصباحات
الغمّ ويّا الأوه والضيق معطوف=تجمّعن وأفكاري السود برفوف
كنّي بعد بُعْد النّظر صرت مكفوف=والي حكى , قلت ايش؟ ردّ العبارات
القاف قلبي من بعدها تغلّق =وشوك السدر كنّه بنحره تسلّق
وكنّه على راس الطويلة تعلّق=إمّا يطيح أو طار لا جات هبات
ليت الأماني ما تجي بالتوافيق=يا ليتها بطول المُنَى والبواريق
ما كان شبّت من حَزَنَّها المعاريق=ولا كانها صكّت علينا البراجات
الكاف كنّ ضلوع صدري تفكك=صرّة ركاب بغارب هديب يحتك
يكتم ولوهو من المفارق يدكك= يالله عسى عقبى التلاقي بجنّات
دار الفنا ما وردّت غير مع شوك=والي تأملّها تجوّد له سلوك
لو طالت إلا الوقت يغلق به البوك=ما تضحك إلا والنواجذ مجذّات
اللام ليل متون عنقاي ليّل=لامن تراجد كنه السيل هيّل
خشمي على مفرق شعرها تويّل=يالله تجيب النود لو بالخيالات
خيالها يشفي ليا هبّ مقيال=ومع الصباح وعسعسة ليل الأليال
خيالها كنّه من الغيث همال=يحيي اليباس وينشز إن هلل رْفات
الميم من شوقي لها قمت منجوم=لديار أهلها بس أبي ريح يشموم
جدران أهلها كل ما أقبل لي تقوم=كنها ترحّب بي ونا أرد الأصوات
(ا) دْيارهم عندي عزيزات وحْشام =من دونها كلّي ولا لحظة تْضام
جعل المطر يسقي هك الديرة أعوام=من حولها تطرب لحون الحمامات
النون نادا خافقي منزل النون=ربٍّ تبارك عالم بكل مكنون
من يجمع أرواح الخلايق على ظنون=يجعل لنا لقيا فلا الها نهايات
لقيا بعد طول التنائي والأشجان=من حلوها تطرب عصافير الأغصان
لا قيل تمّ آقول هو ويش به كان=أنسى الدهور المجدبة في سويعات
الهاء هويت اللي فلا مثلها به =غرّافة ٍ لحروف قلبي تنبّه
لبّى شفاها وسكّر الفم لبّه=الي قبل لا أحكي تعرف الاجابات
سكّر حكاها من زوايد حلاها=آرقّ من مسك ٍ نزل من علاها
نادي عرقها كنّه اللي فداها=يسري بها ويعشق تفاصيل الآيات
الواو لولا ابليس يأتي بعد لو=خطفتها وخليت أهلها يولّو
ويش أنت لاقي بالهوا قال كلّو=طبع الشمالي لا هوا ينكر الذّات
انا فداها لعينها لا قطع الدّو =جبريل قد ناقي لعل أبلغ الجو
ضميان كلّي والمعاليق جفّو =وليا وصلنا صِدّ عنها بحسْنات
الياء يمين الله ما أنسى وليفي=ون قال قايل قلت ياخي بكيفي
هذا ولا دمعي بفقده ذريفي=وصبري على الدنيا , جمل كيف ما جات
إن عادت الدنيا علينا بعالي=وإن قفّت الدنيا فهو كل غالي
عز الله إنّه صاحبي راس مالي=وعز الله إنّه غير كل العريبات