السلام عليكم ورحمة الله وبركاتة
اعتذر عن الانقطاع لظروف العمل وهذه ابيات متواضعة عسى ان تشفع لي
صباح الخير ياوجه السعد يالغالي الدلوع=أمانة والجروح اقصاص لاتجرح هوى عيني
تخيرتك من ازهور الهوى يازهرة الينبوع=قطفتك بالحنان وقلت مسكانك شراييني
تثنى بغصنك الميّاس ماعندي ترى ممنوع=انا من بدّت العشّاق ما اْحب القوانيني
تثنى لي بخجل دام العتب من بيننا مرفوع=وانا فيني نقاط الضعف ماتحتاج تبيـيني
ابشرب من ثغر غنجك وبثمل في هواك سبوع=ولى من فقت عاتبني وشرّبني ملى ايديني
انا في شوفتك تصبح لي الدنيا زهر وشموع=وإلى قفّيت عنّي غابت البسمة عن اسنيني
عساني معدم الطلّه ولا اْعدم زولك المتبوع=ولا اعدم بسمةٍ لاتاهت اقدامي تقدّيني
وقبل شمس الهجير اسألك ياللي جديّلك منسوع=امانه!! ماتحس اني مولع فيك من حيني؟
جهاد بن عبدالعزيز بن عبدالله الشعلان