[الطائر المهاجر]

ما كل ما يعرف عن الوضع ينقال = كم هرجةٍ ودت حياض المنيه
في غابة فيها الحصاني لها القال = والذيب بعد الفرس اصبح ضحيه
والبوم سوقه قام في وقت الانذال= والحر يشكي من ظروفٍ عصيه
اصبح يتيم لا عمام ولا اخوال = يمشي يباري الساس خوف الوشيه
والخلق صارت تعشق الذل للمال= وصاروا عبيد للنفوس الرديه
ومن بعد مالعربان مضرب للامثال = عزه وكرامه مامشوا بالدنيه
تغيروا مابين خاين ودلال = وعميل للعادي بجهر وخفيه
يرضيه لو يسطّر على الوجه بنعال= ولو باع دينه والوطن بالسويه
من اجل دنيا مابقت يوم في حال= تضحك بوجهه يوم وآخر زريه
وكنز جمع مايوم أخر للاجال = وذكراه ما تغفر لجرم واذيه
لا ياعرب منتم مثل سالف اجيال= سم الحضاره صابكم في الهويه
حتى غديتوا مطمع لكل حيال= ومهما سرق منكم تقولوا هديه
ما يامن النشال ياكود نشال= همه بنفسه لو سرق للرعيه
بلدانكم راحت بتشريد وقتال = وابليس فيكم صاح صبح وعشيه
وانتم تفرقتوا ولا فيه عقّال = وصرتوا ضحايا نعرة المذهبيه
وهذي النتيجه ضعف في ضعف وخبال= ورمز التخلف بين كل البريه
متى على الله ينكشف غيم الاذلال= وتصحى بعد غفوه عقولٍ غبيه