[الطائر المهاجر]

بعض الخطا مثل القزاز اذا انكسر=ما ينتصلح لو بذلت المستحيل
حاول تقلل للاثر لامن ظهر = وعدل لوضعك دونما قال وقيل
واحفظ حلالك فيه درعك والظهر= لا من تخلى عنك ناكر للجميل
لكن ومهما صار ذا امر القدر= فهون على نفسك فمالك من سبيل
واعرف ترى اصعب شي معرفة البشر= فليا تعجل بالحكم دون الدليل
احدٍ تظنه درع لاوقات الخطر=ولا من كشفته حصني يخفي لذيل
واحد توجس منه تاخذ للحذر= وتلقاه وقت الجد ماله من بديل
واحدٍ يدور جاه لو يجمع بعر = من سفرة الأسياد لو يحيا ذليل
والمشكله مثله يهايط في فخر= حنا وحنا شيوخ مافينا دخيل
ولا من بحثت الأمر وامعنت النظر= تعرف بأنه نفو ماهو بالأصيل
خادم مطيع لسيّده سر وجهر = يوفر له اللي يطلبه ماهو بخيل
ومن بعد هذا صار يملك للقصر=واعطي المناصب شان ينهب وسط ليل
ودامه غدا له شان من بعد الفقر= يضرب بسيف السيد مايخشى قبيل
واعرف ترانا لو نراجع للدهر= نلقى زمنا مختلف عن كل جيل
الهرج للدولار في سهل ووعر = كلٍ يبيع اللي يبي لو بالقليل
تدور على الانسان ما تلقى اثر= اجساد دون ارواح في ليلٍ طويل
حنا نعيش بوهم ما جبنا خبر =ولا حسبنا للزمن يومٍ يميل
طبع الزمن دوار ما يعرف مقر= ياسرع مايقلب بعد وقتٍ جميل
فاللي نرى من حولنا فيه العبر= فمن لا اعتبر خادع لنفسه او هبيل