[عبدالله الشويمان]

السلام عليكم ورحمة الله وبركاته..
ولديرتي نصيب من قريحتي..
قصيده في محافظة المذنب عسى ان ترتقي لمستوى اعجابكم.
يقوله الوائلي يا زين طاريها

يا زين ديرة هلي ويا زين طاريها=يفز قلبي لها وآجر موالي
بعيد عنها ونا ما نيب ناسيها=ومنيب عنها ترى داله ولا سالي
المذنب العامره والزين حاليها = دارٍ عسى عزها دايم ومتوالي
الديره اللي بأولها وتاليها = محيينها اهل الكرم تحت الله الوالي
يلفي لها الضيف ويلقى من أهاليها = هلا ومرحب ودلة بن بالهالي
ذباحة الحيل حيث الله معطيها = في صيفها والشتاء يفدون الاجزالي
الدوسري والتميمي نازلٍ فيها = وولاد وائل من اول لهم منزالي
ومطير يبنون مبنى مع مبانيها = استوطنوا عقب ترحالٍ وتجوالي
الحضر والبدو صاروا اخوةٍ فيها = يتبادلون المحبه طابوا الفالي
في عزة الله وعزة حكم واليها = ابن السعود المليك الطيب الغالي
تطورت ديرتي وزانت نواحيها = عمرانها والمزارع سرة البالي
والعلم يزهابها والجهل جافيها = والدين فيها رقى في قمة العالي
فيها المساجد وذكر الله ماليها = طبعٍ لهلها ومنهج عبر الاجيالي
فيها طبيعه ترد الروح وتحييها=فيها شعاب وجبل والسهل ورمالي
عسى مزون الوسم تروي نواصيها=في كل عامٍ عليها الوبل نزالي
يالله يالله يا ربي تغذيها=بالخير دايم وتبقى مضرب امثالي
يقوله الوائلي يا زين طاريها=يفز قلبه لها في كل الاحوالي
الديره اللي من أولها لتاليها = فيها الكرم سهمة اهله اول وتالي

عبدالله الشويمان-الرعد 1427