[الصريح العتيبي]

الخطأ من صاحبي يعتبر عندي صواب = واعتبر عجفاه رغم اعوجتها صايبه
والتمس له عذر واقول من باب العتاب = واتغاضى عنه واسمح بنفسٍ طايبه
والرفيق الشهم ما بيني وبينه حساب = وان بغيت اجزيه ماهيب عني غايبه
مير له عندي رغم ما حصل لين الجناب = وله نفسٍ في لزومه تسد النايبه
والرجال اتبين وقت الشدايد والصعاب= ما تحسب حساب الذاهبه والآيبه
مير انا وقتي تغير وجاء فيه انقلاب = واصبحت فيه الاماني لاهلها خايبه
شايبات من هوايله جنحان الغراب = والليالي السود من كثر جوره شايبه
واحتسب الصبر وارجي من الله الثواب = في جزا نفسٍ عن الظلم وجلى هايبه
وارجي الدعوات يالله يا منشي السحاب = تقبل التوبه لكل العباد التايبه