ياناصر القزلان للورد قطاف
ماهل همالاًً ومارف رفاف=مزناًً تضاحك بارقه في سماره
وماخايلوه أهل المزارع والأرياف=وساقو علية اهل المواشي بشاره
يامرحبا بالخير النادر الواف= نمراً تسلسل من مجاني نماره
بني تميم اللي يقودون الأسلاف=ويطوعون اللي براسه نعاره
في نجد وأطراف الجزيرة والأسياف=بنولهم مجدن عظيم وحضاره
يوم السنين الماضية غبر وعجاف=بفعولهم نالو مكان الصداره
ماعلقو عاني ولاحطو احلاف=حليفهم سيف الظفروالجساره
واليوم نالو ورتقو كل ماناف=قاده وحكام وقضاة وزاره
تميم عادات وتقاليد واعراف=ومجداًً بني ساسة وثبت اجداره
ترضى ويرضون الشوافع والأحناف=والحنبلي والمالكي في دياره
وتغضب ويغضب مدن وشعوب وضفاف=واللي يمين اطويق واللي يساره
ياناصر القزلان للورد قطاف= وانت اقتطفت اليانعه من ثماره
الشعر فيه من الجواهر والأصداف=نوعاًً كسب منه التميمي اخياره
والشعر صيد ابوارديه وحواف=يحتاج قناصه فنون ومهاره
وان نزهه راعيه عن كذب وسفاف=يصير له دايم رصيد وتجاره
ومن يختصر قوله عن اسهاب وسراف=اخذ جميله ورتقا بالعباره
ونا طلبت ابيوته الشرد اسعاف=في ساعة بين الهدو والإثاره
حايلته وعرضني اجنوب وكتاف=وذار وجفل ماعاد اوكد اغباره
اجيه من قدام ويعود اخلاف=وان طاع ولا قلت اطيع اختياره
ولو طاع خليت القلم يرعف ارعاف=سطرت مابين الظلوع ابغزاره
مشاعراًً لهل الوفاء مثلك انظاف=ماخلقت الا للنقا والطهاره
وسلم ودم مازرفلت حم الأشعاف=وماعسعس الليل وتنفس نهاره