[ابومياس]

مذكرات طفل
( الحلقة العشرون)

حلقة من جوى اسوار المدرسة عندما كنت بالصف الثاني او الثالث الابتدائي ماني متذكر

وما ذكرني بهذه القصة الا ابوعبدالله عندما قال لما كنت صغير انط من السطح

للشارع0

اليكم القصة كما يرويها صاحبنا :

كنا في مدرسة طبعاً طين وكنت في الصف الثاني الابتدائي او الثالث

وكان معنا اشناب بالمدرسة يدرسون في الصف الاول

المهم فيه احد الاسناب راح للمدينه التي تتبع لها القرية

طبعاً كان هناك تلفزيون في المدينة اما القرية ماكنا نعرفه

ولا ندري ايش هو لو تجيب لنا تلفزيون يمكن نقول راديو او مسجل هذا التوقع

عند صاحب الخبره 0

المهم اخونا بالله شاف التلفزيون بالمدينة 0 طبعا الخميس والجمعة

ومن صباح الله خير يوم السبت وحنا مانسمع الا صوته

كل شوي ( ستيف ) ( ستيف ) بالعربي غثنا

المهم جلس يتكلم لنا عن ستيف ويقول ان ستيف هذا ينط من مكان الى مكان

وقوي 0 قلنا يعني ايش شكله قال تقريباً مثلي انا

وبعدين اقول لكم ياشباب انا اعرف اسوي مثله

تعلمت كيف يسوي وكيف ينط 0 وبعد شوي راح اعلمك كيف ينط

المهم بالفسحة شوي واستيف التجاري ( التقليد) يطلع على السلم

حق المدرسة للسطح والسلم خشب

يعني مافيه درج وحنا مانسمع الا صياح رفيقنا ستيف ستيف

نتجمع تحت واستيف فوق سطح المدرسة

قال هذي الحركة الاولى اللي يسويها ستيف

وباقي حركات بعد شوي اعلمك اياها 0

كل الطلاب يطالعون له ياحظه ياحظه يعرف يعرف

ياليت نعرف مثله 0 المهم جدار المدرسة ارتفاعه تقريبا 3 امتار او مترين ونصف

جاء ستيف ونط من فوق السطح على الارض وهو ناط يقول ستيف 0

المهم طاح بالارض يوم تغير ستيف صار يبكي وماسك رجله

شوي فقد الوعي (ستيف اوستن) اثر رجله انكسرة

جاء ابوه الله يرحمه واخذه وماشفنا استيف الا بعد شهر على عكاز

وبعد مافك الجبس من رجله نبي الحركة الثانية من حركات ستيف اللي هو يعرفها

على طول قال لا لا لا لا لا

ما اعرف شي قلنا افا انت تذكر يومك تقول لنا انا اعرف حركات ستيف 0

لا ماقلت لكم شي 0 قلنا لا والله بس ماعندك سالفة راحة شجاعتك ياستيف 0


ومن ذاك اليوم استيفنا التقليد مايقدر ينط من عتبة الباب

خايف على نفسه 0
( يتبع )