السلام عليكم ورحمة الله وبركاته
اخترت لمنتدى الفطاحله من روائع شاعر الملاحم / خالد بن غنام السهلي
ياليت لارصدة الذهب راصدينا=ترصد مصادر من يصادر شقانا
تبحث ملفات اسهم المسهمينا=وتصفي الصافي ويصفي سمانا
الاسهم اللي بين كمّ وكمينا=تطلع وتنزل ما اختلف مستوانا
سر ياقلم يفداك من بار فينا=واصرف من كنوز الحشا لاتوانا
البخل بالماجود عيب علينا=والســرف عنه اللي عطانا نهانا
نسري مساري الذيب لامن سرينا =ولانمسح دموع الجبو والجبانا
وعاداتنا نعطي مثل ماخذينا =ولانستغش ولانخون اخويانا
وصدورنا وسع الفضا لافضينا=مير العيون حراب قدم حربانا
واللي يكن لنا مثل ماكنينا=كنا كماهو حيث كنا وكانا
وللسارق المزاح قطع اليمينا=والا عصينا الله فيمن عصانا
نشهر سيوف العز للمعتدينا=ونخفض جناح الذل بين اصدقانا
حنا بطيب اجدادنا ما اكتفينا=ولو عمر بن كلثوم جرب وفانا
ماقال (هبي بصحَنك واصبحينا=مير الله انه لايضيع جزانا
وان كان صار الشك مثل اليقينا=ماهوب ذا اول ميلها اللي وطانا
تخيب فينا هقوة الخايبينا=وتصدق هقاوي القرم فيما هقانا
ومن لادرى عنا عنِه مادرينا=واللي عطاه من النعم مانسانا
واللي فمه مرٍ طوال السنينا=يذوق شربه مر لو ماه مانا
والله يبيض وجه من لامشينا=اما ذكرنا بخير والا نسانا
مكارم الاخلاق للمومنينا=وحثالها لاهل الهوى والهوانا
ندرك ونترك وان وعدنا وفينا=وعن خصمة الارذاال نكرم لحانا
على النقا ماننزوي لادعينا=ولانشرف واحد مادعانا
واهل الحكي من يمنا مفلسينا=مانعطي الناشد كناين خفانا
والرجل لن ماصار عقله رزينا=وطليق يمنى وله وجه ولسانا
والا ادع له بمرافق الراحلينا=الموت ستر للمعاور وامانا
بواسطة ناصر السهلي