ذا حِس طارٍ او ضميرك خفوقهْ= يدقّ به من نازح البين دَقَّاق
الحيّ هُو حيك وطابت وفوقهْ= والدار هي دارك وهذيك الاسواق
يا عبيد خل اللي تشكل بسوقهْ= شيخٍ وهو عبدٍ يذكر بالاعماق
يا قلب وان كانت علومك صدوقهْ= بينك وبين الدار عهدٍ وميثاق
شرواك ينشد عن مغاني تروقهْ= حيثك محبٍّ للمغاني ومشتاق
تذكر بها عيش مضى ما تذوقهْ= يا عونة الله يوم تقسيم الارزاق
إلا ولك فيها مقامٍ طروقهْ= يا عبيد لبسك ناعم الشاش ورقاق
العبد عبدٍ هافياتٍ عموقهْ= ان جاع باق عمومته وان شبع ماق
والحرّ حرٍّ يرفعنه سبوقهْ= والبوم يلعي بين الاَسواقْ خفاق
بع بالهجير وصال حيٍّ تشوقهْ= دارٍ عساها للرزايا بتيفاق
دار الثنا للي بها والمعوقهْ= لو هي عن الدولة على سبعة احواق
دارٍ بها الوالد كثيرٍ عقوقهْ= واللي يعقونه مصلين الاشراق
راعي الوفا منهم عميله يبوقهْ= تلقاه حلافٍ مهينٍ و ملاق
بأركانها المستور ضاعت حقوقهْ= وحقوق داني الجد جت له بالاوفاق
يمسي عريب الخال فيها و نوقهْ= ترعى من الوجلا بها نور الاشفاق
يغدي صبوحه في جباها غبوقهْ= في نازح البيدا من اللال رقراق
كم جر مصقول النمايم بسوقهْ= عليك لبقٍ في مناباه ورقاق
دون العشاير هافياتٍ عروقهْ= والفعل ما يعتاض به طيرة الغاق
ما بين شقاقٍ ورافي شقوقهْ= وشمات مخلوقٍ وعصيان خلاق
تلقى بها هذا على ذا يسوقهْ= الله يعزك و الخواندات بزحاق
يامال هطالٍ صدُوقٍ حقوقهْ= يشبه كما ليلٍ على صبحٍ انساق
ياضي كما حرب النصارى بروقهْ= يطرب له البهلول منهم ويشتاق
يفتل نداف الطها من طبوقهْ= مثل النعام ان ذارهن زول تفاق
ترفا مريضات النسايم فتوقهْ= لجبٍ عسى ما في نوِيه بتيفاق
تسوقه الغربي والأخرى تعوقهْ= مترادفٍ مبناه طاقٍ على طاق
يفتر عن مثل الدحاريج موقهْ= أربع ليالٍ مدلجاتٍ على ساق
وخامس تشوف الدار و الثلج فوقهْ= مثل السرير مجللٍ عاد برواق
تلقى العذارى حسرٍ في صفوقهْ= ياضي لميع خدودهن مثل الاوراق
بين الطموح وبين من شاف شوقهْ= صرعى بها من غير خمرٍ وترياق
تسمع بذا زَجرْ الملك في صعوقهْ= قضى القضا وَالتَّفت السَّاق بالسَّاق
عمت مغاني لاهيٍ في فْسُوقهْ= يظنها خِضْر بن دابيل و اسحاق
رواد بهُمْ ما رادْ بيضا سحُوقهْ= من طولها تمضي على سبعه اطباق
منشي الخيال الى غشى في شروقهْ= يحده اللاهب ويغويه براق
كل النجيب وكل ماله يسوقهْ= وكل العقب ومن بغا الطيب ما ماق
واللي يرى ضد الوفا ما يذوقهْ= يدق به من نازح البين دقاق