[الطائر المهاجر]

كلمـا قلت زل الهم جتني هموم = يالله انّك عليم الحال ويش السواه
اشتكي لك حبيبٍ من عرفته ظلـوم = يرفض علاج قلبٍ بالسحر ابتلاه
صرت مثـل اليتيم اللي بوسط السموم = تايهٍ في طريقٍ ما عرف منتهاه
قلت وينـك مروّح قـال مالك لـزوم = لا تقول لي ترى امك سافرت للآله
ادري امي تمّشى خلف ذيك الحـزوم = راحت تجيب لعبه ما خذتني معاه
الطفـوله بـراءه والمحبه سقـوم = من يلـوم اللذي حبّه لحبّه عمـاه
صار مثـل اللذي خبره بحاله يعوم = لين طبّ البحر والموج يلعن ثواه
من توهق ببحر الحب صار محكوم = دبرته عند حبٍ ما درى عن هواه
كلمـا قـال يا حبي كفـاني هموم = قالت اصبر فهذا الوقت يفرض قضاه
ان سكت بان قهـره وان تكلّم ملوم = كل حرف كما البارود يفضح خفاه
ولو يحـاول يجامل انكشف ما يدوم = تفضح العين ستره مايفيده دهاه
ولو يسايس حروفه بيّنت للخصوم = دام قلب المعنّـا يشتكي من لضاه
غسّل ايـديه من وقتٍ جحـد للسلوم = وصار كنه غرابٍ تايهـات خطاه
لا (تأمرك) بفكره كود سهمه يقوم = ولا لجا للترهبل بالنفاق اشتراه
ضاع عمره بليلٍ ما عرف للنجوم= والنهـايه سحب عمره الى منتهاه
كيف يصبر علـى وقتٍ يذل الخشوم = يشـوي الصقر حيٍّ بالقهر من بلاه
كيف يصبرعلـى وقتٍ يشوفه غشوم= كل حر يعـاني من زمـانه وطـاه
وين حقـك وحقـي يا ترى من نلوم = دام مالك ومالي جـاه والا وجـاه
من يدافـع عن المظلوم شق الهـدوم= من هـو اطعم فقيرٍ في زمان الرفاه
وين حـق التساوي والعـدل للعموم = "وين" .. جرحٍ نزيفه ما عرفنا دواه
ويستمر التفاخر كيف طلنا الغيوم= والحقيقه انحدرنا في حضيض الرداه
الزمن من عرفته ما يبا الا الرخوم = ما يبي الحر الاشقر دام فكره معاه
يمـدح السوق من ربحه يحسبه يدوم = ومن حسب للخساره ما تكدر مساه
وبيت يسكت على عيبه وساسٍ هضوم= يوم يسقط على راعيه هذا جزاه