[الطائر المهاجر]

جتني تقـول العـذر يا عزّ غالي = من غيرك اللي ماخذ القلب ويّاه
اشتقت لك شـوق الظبي للظلالي= عطشان مطرودٍ وتاهت به خطاه
جيتك عسى تعطف وتشفق بحالي = وتدمح لقلبٍ غرّه ابليس واغواه
ما كنّهـا من قـال : " دوّر بدالي" = يومٍ خدعهـا مدّعي المال والجاه
ودّي اسـامح لكن اللي جـرى لي= صعبٍ على مثلي مع الطول ينساه
دربي وضوحٍ والوفاء من خصالي= لكن مـع اللـي يستحقه ويرعاه
لعبت بقـلبٍ ما عرف للختــالي= واثري مثل من ينقـل الداب برداه
ما يلـدغ المـؤمن مرارٍ تـوالي= تكفيـه مـرّه ينتبـه وين ماطـاه
ماعـاد لك رجعه ولا به مجالي= النفس شامت من عثى الذيب بحماه
روحي مع النسيان وانسي خيالي = ولا تفكرين القلب ينسى المعاناه
(من عافنا عفنـاه لـو كان غالي)= ومن باعنـا للكاش ببـلاش بعناه
(من صدّ عن عيني سلى عنه بالي) = ما ادوّر المقفـي ولا لي بطـرياه
لا من بدا لك من حبيبك تعــالي = خلّـه يربّيه الزمن لا ترجّـاه
حب المصـالح ينتهي بالـزوالي = مهما تغطّى يكشف الوقت مرماه
دوّر عن اللي يرفـع الراس عالي = حبٍّ يحب الروح بالروح يفداه