[الطائر المهاجر]

جتني تشكّى من الألم والمعاناه = والضرب واضح والدمع في مآقيه
تبكي حبيب القلب جوره توطاه = من عقب ما هو بالمـودّه يراعيه
تقـول عيب يبيّح القلب شكواه = لكنّ جـرحه يكشف اللـي يخبّيه
يا حيسفا عمرٍ قضيته ابرجواه = اشريه بالغـالي وبالروح انا افديه
زوجي تغيّروانقلب ذيب بعواه = يفرس هله من دون عقـلٍ يخاويه
ياما تحملته وانا اركض على رضاه = واثره طغى بالجور وابليس يغويه
يخطي عليّ بلا سبايب ولا سواه = ويهينني عند الأهل او ابناخيه
ما نيب عبده اشتراها ولا شاه = حرّة اصيلة ، مقبل اللي يسويه
وش غيّره وش بدلّه ويش اعماه = وأنا حسبته حرّ ثبته مباديه
امن اولٍ افرح إذا جات طرياه = واليـوم كرّهني بنفسه وطاريه
وبيتي من اول جنةٍ دوم انا اهواه = واليوم احسّه نار مالي بصاليه
رجلي ولا ادري وش يبي زاد بلواه= حساس جاهز ثايرٍ في تحدّيه
ان جبت له ورع يبي بنت تلقاه = وان جبت له بنتٍ يبي ورعٍ يغليه
وهـذي امورٍ عند رب السماواه = لكن جاهل يحسب الأمر بيديه
بالله قل له جــاوز السيل لزباه = فيني يخـاف الله اذا كان يرجيه
ما هي رجوله فعلته في اللي اعطاه = قلبه وعمره ساكتٍ عن بلاويه
من يضرب الحرمه جبانٍ من اقصاه = لو به شجاعة كان حلمه يباريه
حرمتك سترك تحفظ اسمك وتحماه = ان كنت حاضر او مسافر وتغليه
لاتحـدّها تثـأر بلحظـه من الآه = من حرّ ما توجس ببيتك ولاضيه
تنـدم علـى فعـلك بحبٍ ترهّاه = وتهدم حصين البيت لا شئ يبنيه
يا غـافل استيقـظ تفّهـم لمعناه = حكم ضميرك والعقـل لا تخليه
"يا انجشه رفقاً " ، كـلامٍ بمغزاه = سيد البشر قـاله ، ولازم تراعيه
والله ومرنا بالعتـق ، كيف تنساه = وتستعبد الحرمه وتجهـل مآسيه
من لا احترم نفسه ترى الخلق تاطاه = ومن يضرب الحرمه يدور مداويه
بالعقـل سايسها مثـل مهر ترعاه = وبكلمة حنانٍ تملك القلب تشريه