ياجبر هو ضيم الليالي ينجلي = او هو يخيم في حشاي ويطولي
ياجبر هو ضيم الليالي ينجلي=أو هو يخيم بالحشا ويطولي
أعض أطراف البنان بناجدي=والدمع حرق وجنتي ويهلهلي
والعين كن الشب يجلا موقها=والنوم عني له زمان مطولي
ياجبر وأن بانت عيوبي للملا=تراه من فرقا غزال عندلي
حورية تجلا الظلام بعينها=سبع المثاني حرزها ماينطلي
ثيابها تشكي لضيم ردوفها=والوسط كشاخ الجديد معزلي
أليا مشت كن النعاس بعينها=من ثقل ردف مثل طعس معتلي
أن أشهد أن اللي خلقها قادر=لحيثه بخلق ردوفها متجزلي
ساعة نطحني يوم شفته مقبل=أغشي علي وطحت من يوم أقبلي
أن صد عني شفت بيض خدودها=يصد لامنه لحظني وأغفلي
ثم صابني ماخاف من والي السماء=من غير ذنب ياغزال العندلي
دنق علي وقال ذبحتني وثنيتني=ذبحت نفسي وأنت لست تحللي
له قلت لابيحك ولاأبري ذمتك=حسبي أذا كان الولي متوكلي
أنا حبيبك كان حبك صادق=والهقوة أنك ناكر متحيلي
قال أنا سقيتك وأبريت ذمتي=من كوثر بين الشفايا سلسلي
تعذرت ياجبر وأبدت عذرها=وأليا حلف بالله لازم تقبلي
يقول كان تهواني فأعلم ترى=أني وراكم ناشد وسايلي
ثم حكمت حبل المواصل بيننا=وشربت ريق كالنبات معسلي
وأصبحت في بحر الغرام مسمر=وبحر الهوى ياجبر غرق محملي
في حب ظبي له هوى في ظامري=ألك العنا ياعاذلي لاتعذلي
من لامني جعله يكوس من العمى=أعمى أصم مايقوم محرولي
أسريلها عقب العتيم بساعة=والكف من صنع الهنود مصقلي
أخاف من سبع الظلام يهومني=يبغي عساني منه أذل أو أجفلي
مالي صديق الأ السيف الصادق=يضحك أليا ماناش حد المفصلي
ياجبر حد السيف مفتاح الفرج=تراه لصعوب الرجال يذللي
لانامو الحساد والواشي سرى=وقامت عيون العاشقين تبهذلي
وهملت بأطراف البنان ردوفها=وأخفيلها أسمي ماأخافه تخجلي
وأقول لها أهلا وسهلا ياهلا=ويقول لي أهلا وسهلأ ياهلي
وسدتها زندي وصار وسادتي=زندلها لين النجوم تكملي
هاروت سحره ناشي في عينها=تودع قلوب العاشقين تبلبلي
هي سقم حالي هي شقاي وعلتي=وهي دواي أن ذر فوق المفصلي
ياجبر جاني بالصدود وعافني=من عقب ماهو مود لي مقبلي
نسى الجميل وبار في صويحبي=وأن شافني بالسوق دلأ يعجلي
أن قلت ويش السبب في ذا الجفا=أكثر عذاره قال خوف من هلي
ياجبر يوم الولف مايخشا هله=وأليا تباطا جيتيله دزلي
ياجبر ماتسعا بصلح بيننا=حتى تنول الخير وأنت محللي
ياجبر ماشافت عيوني مثلها=مصيونة ماوقفت في محفلي
ياجبر لو يرجعن عصور الصبا=يروق لقلب العليل الممحلي
عزيل قلب شارب كاس الهوى=والنوم عافه مع لذيذ الماكلي
ياجبر كان الجبال تزلزلت=رجيت حبه عن ظميري يرحلي
ماأعرف حب العذارى قبل ذا=ياجبر حب البيض أثره يقتلي
ياجبر حبه في ظميري عاقني=قد حط في رجلي حديد مقفلي
هو مقفي مني وأنا في ساقته=يسري وأنا يضحي الضحى في منزلي
مضى زمانك ياأبن حزمي عامر= وأنا زماني خارب متعطلي