عدّيت مرقاب بصف المطيليع =وأخذت بالمرقاب لي وقت ساعه
وقعدت فيه اشرا من الفكر وأبيع =في المرقب اللي شاقني بارتفاعه
وداور افكاري على غير ما طيع =وغير المثايل ما نجيد استطاعه
بس أتذكر وقتنا في المرابيع =وممشا الفياض وشوف ذاك الجماعه
يوم الربيع ويوم ذيك المطاليع =ويوم البيوت اللي وساعن رباعه
مع شوف بالرفه ثلاث مهانيع =ونجرن البادقة يشوق استماعه
ولقط الزبيدي بالفياض المصاليع =وتغريده الورقا بذيك الرفاعه
وشوفة زهر عشبي إبعص المراجيع =رجع الشعيب اللي محير أتساعه
اللي زهو عشبه إمنوع تنويع =اصفر هو وردي بياضه بقاعه
واليوم في بعض المطاوي مصاديع =أقفا ثراه وزايد بانصراعه
وتشوف من بعض البوارح قراطيع =والقيض بين قام يرفع إشراعه
وثلاثة أشهر ما تطرا المناجيع =واليا مضى الرابع بدو بأنشلاعه
وسقوا الميا نسم براد الذعاذيع =وسهيل قبل الصبح يبدي شعاعه
وعقبه دخول الوسم حسبة تسابيع =والغيم بأمر مكوّن الكون طاعه
يجي من القبله لبرقه تلاميع =للشرق وآمره الولي باندفاعه