[ابو أنس]

اعرف ترى مانيب كاذب وهقّاص=واللي أقوله صدق معنى ونَصّه
اطرب الى شفتك ولك ود واخلاص=كل شارب(ن) ياخوي عندي مقصّه
ياطيّب السيره ولك موقع(ن) خاص=الله جعل لك في ضميري منصّه
وانتا من اللي للمواجيب قنّاص=بالحق صادح ما يجي فيك غصه
تستاهل الفنجال مبدا ومنكاص=لك نحمس الطبخه ولك بس اخصه
ياخوي حنا لك مشافيق وحراص=نهوى قصيدك وان حوى زود قصه
لذيذ قولك طعمته كنها خلاص=من دار هجر مضمدينه بجصه
وان كان تشكي من فعل فعلة الماص= سوا سواته والسبب بس بصه
من لفتت(ن) وحده وقطّيتها خراص=العيد جبته والرصيف بتقصه
فاعرف ترى هذا السحر ماحد(ن) حاص=منّه وقبلك سود الاشناب لصّه
اتعب صليب الراس لصّه بلصاص=تلقاه من عقب التعجرف مقصّه
ان لعب بالديمن نزل باكة الهاص=والا الولد يحوش كسبه يمصّه
الله خلق كل الضدايد بأشخاص=تلقى التناقض والعجايب بشخصه
رقه ولين ونظرة(ن) تقل مفراص=تصطي على قلبك والابهر تقصّه
والى هرج نغمه وتبنى على الداص1=تِطْرِب ولكن عقبها ألف غصّه
ما لوم قلبك لو تكهرب ولا ناص=ما يحتمل قلبي ولا نص نصّه
الفاتنات وحبهن في الحشا غاص=تملكن في القلب جاله وفصّه
في ذمّتي ماهن قليلات ورخاص=ولهن مع بيوت الشعر زود رقصه
جعلك تنول من المنى طعم الاجاص=طعم العنب والخوخ والتوت رصّه

الداص تعبيرا عن الموسيقى (السلم الموسيقي)