ماقوى وداعك كيف أودعك وشلون = مالي على فرقاك يازين طاقه
انت الوحيد اللي به القلب مفتون= ماقبلك أحد ٍ صار لي به علاقه
انت الحياة اللي لها الناس يسعون = والا وداعك موت مر ٍ مذاقه
أحييت قلبي بعدماكان مدفون = علمتني معنى الأدب واللباقه
من رحت عني طيلة الوقت محزون= دايم حبيس البيت ماقوى فراقه
أبكي خفا مابغى المخاليق يدرون = والقلب زادت علته واحتراقه
ان طال عني بعدكم مت مغبون = أو عشت عيشه ماعليها شفاقه
وان كان جوك الناس فيني يعزون= ارجوك تكتب فوق قبري بطاقه
هذا قتيل الود ياللي تشوفون = وانثر على قبري من الورد باقه