راع المحـبـه يطـيـر الـنــوم عـن مـوقـه=والـزاد تـمـضـي ثـلاث ايـام مـاذاقـه
كـن الافـاعـي تـغـرز الـنـاب بـعـروقــه=ولاتـنـفـعـه حـجـبـة الـحـاجـم وترياقه
الـروح كـن الجـبـال الـسـود مـن فـوقـه=ضاقـت سبب لاهب المحبوب واشواقه
باسباب ريمـن خـفـوقي ضاع في سوقه=نـظـرة عـيــونـه وزيـنــه جـل خـلاقـه
ريمـن عليها عـطـور الـمـسـك مـدفـوقه=تسرق خـفـوقـن غـدت تومـي بمـعلاقه
عـيـن اشـقـرن جـمـرة الـقـداح بحدوقه=حـر(ن)جـليلن ربـى في راس شوهـاقه
يمـنـاه تـودع عـروق الـصـدر مـشـلوقه=عـادات كـفـه لـصـدر الـصـيـد صفاقه
والـجـسـم ياعــود مـوزن مـال بـعـذوقه=يشـرب على جـاري الماطر ومـشراقه
هــنـي مـن شـافـهـا بالـكـرت مـرفـوقـه=فـي دفـتــر الـعــايـلـه والخـتم باوراقه
هـجـره كـوى الخـافـق الضايع ومعلوقه=وهـو يـنـتظر شـوفة الـغـالي على فاقه
ماجاء على البال درب الـغـدر والـبـوقه=ولا لي على هجرها حـيل(ن)ولا طاقه
الليل يمـضـي وروحـي تـقــل مـشـنـوقه=والبيض تقصد هـوان النـفـس بفراقه
تفـرح بـقـلـبـن يذوق الضـيـم من شـوقه=وترسل رماحن لوسط الجـوف سراقه
لـيـتـي علـى اللي يهوم الطـعـس وفلوقه=جـيـبن يدوج الحصى الوقاف واشناقه
لاهـابـت الناس بعض الطرق من ضوقه=الجـيـب يلـقـى بوسـط الضيق منطاقه
ادهـج ريـاضـن ربـيـعـه شرق مـن لوقه=تجـمـع طـرايف زهور الوسم وارناقه
تـفـتـح قـفـولـن بوسـط الـصـدر مغلوقه=وتطرب عـيـونـن تهل الدمـع لا ضاقه
وابدع حـروفـن يهـيـل الـنـاس طـاروقه=من غـيـظ روحـن لجـزل القاف سباقه
اطـرد طـوالـع جـزيـل الـصـيـد وفروقه=مع بـنـدقـن يـضـبـط الـمـنـظـار تفاقه
بظلال غـيـمـن غـزيـر الـغـيـث بطبوقه=لاثــار مــرزم رعـــوده لاح بـراقـــه
روحي غـدت من طعون البيض مرهوقه=من جمر نار(ن)لوسط الجوف حـراقه
مالـي سـوى اللي سحـرني زين منطوقه=وعلاج هـمـي هـوى المجمول وعناقه
عـقـب السـعـاده وقـعـت بـنـار خـازوقه=ضامت قـلـوبـن لـدرب الطيب منساقه
عـقـدت مـعـهـا حـبـال العـشـق وحقوقه=وظـنـيـتـهـا مـثـل نار القلب واشـواقه
والـيـوم كـبـدي عـلـى فـرقــاه محروقـه=وعـزي لـمـن كـاوي الـفـرقى بخـفاقه
يانور عـيـنـي ظـلـوعـي مـنـك مـفـتوقه=روفـي بـروحـن لـذوق شـفـاك تـواقـه
روحن غدت من هجـوس الليل مطفـوقه=والـسـهـر يـودع عـزوم الـناس مـنعاقه
وكان الوعايـد بدرب الـعشق مـفـهـوقـه=وعفتي عـهـود الـهـوى الوافـي وميثاقه
حطوا على الـقـبـر تـحت الراس طابوقه=ولا هو جزاء اللي هوى الغالي من اعماقه