[الصريح العتيبي]

حييت ياشعراّ دعتني قوافيه=وحييت ياصوت الهمام الشجاعي
بحراّ يموج ويتعب اللي يجاريه=بالشعر واعلوم الوفا والطباعي
حاولت والا من يحاول يناحيه=أما غرق والا مع الموج ضاعي
واللي يبيه وفي طريقه يباريه=يصير مثله حاضر الحس واعي
يسرح مساريحه ويسري مساريه=يصبح بقاع ويمسي ايضاّ بقاعي
وانا ضروفي مانعتني لاخاويه=بيني وبين ايام وقتي صراعي
والا القصيد اشتاق واحب اسويه=الشعر اخوي من النسب والرضاعي
سيل يجيني يدّحم من مجاريه=والمد مدي فيه والصاع صاعي
اليا برق له بارقّ في مناشيه=يهل هماله وينبت مراعي
احرص على سبكه وجودة معانيه=وروضه لعكفان الشوارب مشاعي
فيما مضى واليوم كثرة بلاويه=اصبح طرب والا ضمان اجتماعي
ياناصر اللي مشغلاته مناحيه=يشعاه من باب الهواجيس شاعي
خله بحاله لاتهّيض طواريه=يعيش في الدنيا كفاح وقناعي
بعد رست بواخره في موانيه=عن طيب نفس وعن رضى واقتناعي
ماله مع التجار سوقّ يحاضيه=ولاله ولاله في المجال الصناعي
ولاهوب شاوياّ يتابع مواشيه=ولاهوب فلاحّ بحقل زراعي
شربه من الزمزم وخبزه تكفيه=شبعان عزة نفس فوق الشباعي
في روضة المسجد وفرضه يصليه=اذعت سراّ مابغيته يذاعي
والبحر ياناصر مغادر شواطيه=اخذت مجدافي وطاوي شراعي

اخر ماخطه قلمي
الاربعـــــــــاء
27/7/1429هـ