[هاجس نجد]

المشاركة الأصلية كتبت بواسطة شجاع عمر الأكلبي

هات الورق معه القلم وحبوره=ودي بنظم القاف فوق سطوره
أنا عنان القاف ياجاهلني=أخذ سمينه وأترك المثبوره
لا من قاف البدع شاب وهرّم=فأنا طبيبٍ له وأنا دكتوره
أطوع المعنى مثل صعب البل=وأرد خشمه لابغيت لزوره
مانيب في طرق المعاني جاهل=ولا حتاج عندك يالمغني دوره
أقدم الجزله وأنا راعيعها=وأميّز السمحة من المكسوره
يارجل ياللي مستميت بنقدي=نفسي على ماشفت لي مفطوره
وفــّر على نفسك وريّح بالك=بأرحل ونفسك جعلها مسروره
الدار ملكك والضيوف تغادر=والدار راقبها من المقصورة
من بعد ذا وجدي على شوف البل=ترعى الورق في ديرةٍ مقفوره
مال الغنم في مرتع البل طاري=مافيه كود الصيده المذيوره
تجزي ثلاث شهور ولا أكثر=ألحيّها بطرف الورق مسموره
ما تلتفت للموتر اللي مقبل=لو ينثر البرسيم مع مشعوره
حليبها يجلى الغثا من كبدي=هجال لا شماله ولا مصروره
طاروقها لا ما أنتوت يطربني=تقول صفّة جند في طابوره
وان صاح راعيها عليها جالت=وأنحاز من جل الدبش مقهوره
من أولٍ ماكلنا نقناها=ومن وفروها بالعقل معذوره
اللي غزاها والذي يرعاها=إدميّهم من دونها مهدوره
الروح ترخص لأجلها ورضاها=واللي قنوها روسهم مسطوره
وختامها صلوا على سيدنا= اللي ذنوبه من الولي مغفوره

الشاعر العزيز / شجاع عمر الأكلبي

صح لسانك يا أبو عمر

عزالله انها قصيدة تنومس

وافيه من وافي

تدل على الشجاعة والعلوم الغانمه

وحب الإبل والصحراء والحرية المطلقة

نعم حب الإبل اللتي ترخص لها الروح

ياكم وكم نفسٍ طاحت دونها

بيض الله وجهك على إبداعك منقطع النظير

تقبل تحياتي وتقديري

أخـــــوك

سعــد بن عبــد الله العبيــد