الفاضله حوريه..............
رغم انني أحب القراءه وأأنس بها كثيرا ولا أجيد الكتابه خفيفة الظل وقد أقمت كثيرا عند مشاركتك الأولى وبقية المشاركات مستمتعا ضاحكا
ولذا. أقول محاولاً.....
مره وانا في الإبتدائي ـ طبعا ماكانت الدبابات ابو اربع كفرات موجوده ـ وكان أقصى ما يمتعنا من المركوبات السيكل. ونظرا للحاله الماديه ما كان عندي سيكل. وولد عمي عنده وحنا مجتمعين مثل العاده جاب سيكله وحول يبي يزين له شي نسيته
المهم قمزت على السيكل وانا ما اعرف اسوق في سوق ضيق خذت السيكل خلسه وان امشي أتهزهز وكل شي في ماخذ حده والى قدامي ذاك الشويب يمشي في وسط الشارع وما قدرت الف عنه او اقول له وخر ..
وانا أركده بين رجليه واصدمه والاه على وجهه
لكنه الله يرحمه كان نشيط قام ولحقني وانا منحاش بكل قوتي .
في زاوية الشارع كان فيه بياره ـ الله يكرمكم توها تحفر ـ وانا لاف مع السرعه زلقت رجلي وابغي اروح في ها الحفره تجي لها ستة أمتار او أكثر لكن لطف الله ثم السياج الخشبش اللي يحطونه حمايه مسكني مثل صدمتي للرجال
عاد هو يوم شاف الموقف خاف شوي ورجع... لكنه خذ السيكل وياالله بالوساطات رضى يرجعه.
وفي نفس المكان ونفس السيكل خذته مرة ثانيه بس مع الجهه الثانيه من الشارع وكان في رمل ...يعني لازم اسرع علشان آخذ عزم لايغرز
مع السرعه تعديت الرمل لكني ما قدرت ألف للشارع الثاني وقدامي جدار فيه ماصورة تصريف الماء من السطح .وعينك ما تشوف الا النور..........
ولا ومن زين التصرف ابا احمى السيكل رحت اقدم وجي للماصوره
بقية الموقف والآثار لكم ان تتخيلوها
واكود منها هوش (تأنيب) أهلي يوم رجعت للبيت...يعني مافيه مواساة
وجه وارم وثوب منشق وهوش
لكم التحيه