(ف)سلام ياهل الشات واهل التوناس = نادو محمد واقربو لي سناعيس
اصحاب قلبي غير عن كل الاجناس = بيض القلوب وبالمواقف قرانيس
(س)يامرحبا ياشيخ ياصاحي الراس=ياللي وجودك للفطاحل نواميس
حنا على عهدك ومن بدة الناس=نغليك يابن الناس ونشعل فوانيس
(ف)الليل طيب مابنا عد الانفاس= جينا على وضح النقاء بالمقاييس
من يمكم ياصاحبي هب نسناس = كني معك وانته معي نحدي العيس
(س)اكيد مثلك لو تعدى فلا باس=نركب سوى ونحد بعض السواديس
واللي يبي معنا ولاهوب هلاس=ناخذ معه جوله بكل التضاريس
(ف)مايتعدى خط الاجواد حساس= والله يجنبنا طريق الملاحيس
واضح وماني بين الا خوان دساس= لاهيض الهاجوس جبت الكراريس
(س)كفو كفو ياصاح ياجزل الاحساس=أنا اشهد انك ماتحب اللواليس
تمشي عدال بدون ماتباري الساس=وتاطا على خشوم(ن)اهلها مناجيس
(ف)سلمت ياراسن على الطيب ينباس = نسل الكرام اهل القناء والمتاريس
الي لهم في صفحة المجد مغراس = يوفون بالملقى على كل عتريس
(س)يالطيب اللي مابمدحك لنا كاس=لكن نقول الحق ماهوب تهليس
بس انت قللي وش علاج اللذي داس =قلب السكيبي وابلشه بالوساويس
(ف)ياصاحبي ماتاه بالبحر غطاس = ومثلك يشوف ولا يبا له معاسيس
واذا بغيت الشور وضح بالاوجاس = مدري قمر او شمس صاحبك ياقيس
(س)ادري ولكن بحره اقسى من الماس=والين من المخمل ولا هو بعد حيس
ياقدرة الله اصفق اخماس واسداس= وانت أتعرفني ما احب المطاريس