السلام عليكم ...
الفطاحلة الكرام ..
ويتجدد اللقاء معكم عبر الأثير
والمشاركة الجديدة ....
ذرى الفيـّه
======
سلام الله على منهو تهيّض لأجله الطاروق = بديت باسم رب ٍ واحد ٍ ما خاب طلابّه
أبا ابدع ما تيّسرمن نظيف الهرج والمنطوق = لشخص ٍ مايعرف الذم وما قد مرّ مع بابه
طواريقي أبا انظمها على المربوع = وهذا شيء في طرق الشعر مشروع
وإذا ما يعجبن بأغيّر الموضوع = عقب طريا ًطرت بالصاحب الغالي
سبايب ماجرالي ياجماعة واحد ٍ مطفوق = تفارقنا أنا والزين وكله صار بأسبابه
عسى الله يبتليه بعارض ٍ مكتوب له من فوق = كسيرالساق ومجروح الفواد لغيبة أحبابه
شكيت الحال لله يوم أنا منهوك = من اللي في غلاها صاير ٍ مشبوك
طريح البيض قلبه بالهوى مدكوك = يعذّب من فراق الصاحب الغالي
ذبحني يالربع قد ٍ تثنى فارع ٍ ممشوق = تهزّع مثل غصن ٍ في ذرى الفيّه بمشرابه
تعدّت وإنتلت قلبي من أقصى الجوف والمعلوق =بنتل ٍ مثل نتل الضاري لصيده بمخلابه
أنا رجّال مالي في الحكي راده = ولاراعي العذل في حلقي قلاده
عجب كيف القتيل ايزور جلادّه = وهو عمره أسيرالصاحب الغالي
ألا يابري حالي عقب مااقفت ما شيه برفوق = بردف ٍ يطوي الملبوس إلا قامت تثنّابه
تجلـّت قدرة الخلاّق متقن صنعة المخلوق = قدمها وسط كبدي كل خطوة يغرس كعابه
الا ياليت مامرّت تثنّى لي = طوت حبل الرجا من كل آمالي
عليها زا يد ٍ همي وغربالي = تذكرّني وصوف الصاحب الغالي
وساعة ماتعد تني وقلبي والعقل مسروق = صفت عشري ثمان وماهقيت البنت نهّابه
عليها الله أكبر صوّبتني والهوى ممحوق = أنا حذر ٍ ولكن القدر أسرع بمضرابه
أنا أدري إن الهوى من أوله مذموم = وفي تاليه كاس ٍ ينشرب مسموم
وياما عاشق ٍ من صاحبه محروم = شكا كثرت غياب الصاحب الغالي
وترى مانيب الأول خابر إني في الهوى مسبوق = وكل اللي جرالي ماجرى لأحد ٍ ولاصابه
وقلب اللي سبقني في الهوى ماختم له ملصوق = يفيد إن الهوى ملكه ولا أحد ٍ فيه طلاّبه
أظن لوهو سبق مليون في العشاق = وماتوا من عذاب الحب والأشواق
نهايات اللقاء لابد فيه فراق = ولوعاشوا دهر يالصاحب الغالي
محمد بن عما ر