جاني صحيبً غاليً يشكي الحال=يشكي ودمع العين بالحيل همله
عشرة عمر واعرفه للحمل شيال=ويبكي ولاهي ياعرب عادةًله
سميت بسم الله وقلتله بالحال=عطني صحيح العلم دقه وجله
ياصاحبي لاشفت انا دموع الاطفال=عيني تجافي لذة النوم لاجله
وشلون لاشفته على خد رجال=تدري بعيني يظلم الكون كله
اطلب فداك اللي تبي يابن بتال=الروح ويا المال تاتيك عجله
خالد تعرفه يقرن القول بافعال=وماهو من اللي ينقض القول فعله
ولك في ضميره يالخوي قدر واجلال=وانطق تكلم جاوب الذيب قله
ثم نطق يقول والدمع همال=حقد القرايب ماله علاج لله
يقول عود من القرايب علي صال=يعيب فيني والردى شاهدًله
ويطعن بفعلي كل ماجيت مدهال=وبليا سبايب حطني من عدىً له
ولامن هرجت يلومني العم والخال=ولامن طعن هالعود محدً فطن له
لوقلت صلوا الفرض من غرب ياعيال=ينطق يقول الشرق حطوه قبله
ومياه دلوي سقتها عذب وزلال=ويوم ارتوى ذب الدلو فوق حبله
ومديتله من دلة الطيب فنجال=ويمدلي من سود الافعال دله
مدري تزر العودعذبات الافعال=لامن ذكرني راعي الطيب قبله
والا تزر العود لباسة الشال=وعقله عقل عنتر لياشاف عبله
تلعب بعقله والضحايا لها اعيال=اعيال عمً مالهم ذنب لله
وان كان حقد العودمن ثار قدزال=وش ذنب راعي الطيب وش ذنب نسله
عجزت افسر والقى للجيم مدخال=عاجز الاقي للمضامين حله
مدري ذنوب اتوب والهم ينزال=والا القلوب السود بالحقد بتله
ادري اليهود احزاب ليكود وعمال =وحزب القلوب السود من اي مله