يوم ان نظرته وارسل الحب مرسال = اشعل بقلبي نار تحرق هشيمه
ارتحت يوم ان الوفي جاد بوصال= خفف علي وقع الفراق وجحيمه
ويوم ان سالني يا الغلا وش هو الحال = قلت احمد الله راحتي مستديمه
دامك معي فالحزن في دنيتي زال = وسكن خفوقي معك راحه عظيمه
قال ابشري بالسعد يا بنت رجال = يملك قلوب الناس قدر وحشيمه
ترى هواكم غير الحال بحوال = ولا من اول حبنا الله عليمه
نمشي مع الاهواء من جال لي جال = لكن معك اشعر مشاعر حميمه
والله ما اجفاك لو الزمن مال = وخذي وعودي من نوايا سليمه
قلت اشكرك بالحيل يا طيب الفال = وافي ولا يومٍ تعرف الظليمه
معاك انا حسيت في راحت البال = والقلب يعرف صاحبه من خصيمه
بس انت شبهتك برجال نشال = يسرق وهو ينصح نصائح حكيمه
صراحه انتا بالهوى شخص محتال = تسرق قلوبٍ طاهراتٍ غشيمه
لكن تدري حبكم سهم قتال = وانا ابعلن في هواك الهزيمه
فداك قلبٍ صابه اليوم زلزال = واصبح هواكم ساكنٍ في صميمه