أيا بحر الهوى التريان
دوام بحواك زي القيف
وأرسل ليك عصارة شوق
مستّفه بي حنان الريف
شان تقدر تترجم ليك
نغم حرفين
في بحرك بحسنو التجديف
حنانن بدّل أحوالي
وعُد من تاني حاني ظريف
بحس بيهن
بزاحمن ديمه نبضاتي
ويسرن جوّه مسرى دماي
يعيشن فيهو شرياني
ويغنن لي نغيم لولاي
يدغدغن المشاعر يوت
يحاكن في نغيمة الناي
نسيت من نشوتي الفيني
طردْ كل الأسى الجواي
وبتّق فيني ورد الحب
وبيهن فرهدت دنياي
وعشت الفرحة في ذاتي
ونسيت بالفرحة كل أساي
بقيت أحلم ...
وأدوزن في السُعاد الجاي
وأرسل ليك طيور ريدي
تزورك في نهار الصيف
تحجب ليك شعاع شمسك
ويبقى الضُل حِداك وريـف
يهب تالاك نسيم قبلي
ويجيك هواهوحاني لطيف
ترفرف ليك جنيحات ريد
تزغرد في الزمان الزيف
ترجِّع لي إشاراتك
مرسلة بي حمام زاجل
سريع وأمين .. خفيف وحريف
رساله رقيقة من عندك
بيسعد بيها كل حصيف
أشد صهوة براق طيفك
وأجيك فِسراع
نعيش نشوة هوى العشاق
ونسأل ربنا التخفيف
وننهل من معين صافي
وحب طاهر شفيف وعفيف
16 /1 / 2009م