[الأموره]

ألا يا طفل لا تكبر كذا أجمل كذا أطهر*******كذا أحلى ليا صارت براءة طفل بشعوره
كذا يمكن اقولك انك تنام الليل ما تسهر****** كذا تزهر لك الدنيا تعيش بنفس مسرورة
كذا همّك ليا طالك يجيك الدمع يتعذر***** وتمسح دمعتك لعبه .. ولوح اسود وطبشورة
كذا شفتك وأنا أحاول احد الدمع لا يظهر*****أشيلك بين يدّيني وأشوفك داخل الصورة
كذا شفتك وفي عينك سؤال ٍ صعب يتفسّر***** سؤال ٍ شال من عيني دموع القهر مكسورة
كذا صرخة بدت منك ( أبي اكبر أبي أكبر)***** ألا يا ليت هالصرخة بقت داخلْك مثبورة
كبرت وجاك مطلوبك طموح ٍ غرّه المظهر*****كبرت وضاقت الدنيا وضاق الحرف وبحوره
كبرت وشمعة آمالك بدت تصغر بدت تصغر**** وتصغر داخلك حتى تلاشت عنك مجبورة
كبرت وماتت أفراحك وصارت بالشعر تذكر*** تردّد ما مضى قصّه لطفل ٍ ينتظر دوره
كبرت وأكرمك ربي وصرت الشاعر الأمهر***أو إنك شاعر ٍ عادي خذاك الكبر في نوره
كبرت وأوّل أبياتك وربي للأسف تقهر*** رواية للزمن لكن رواية كذب مبتورة
كبرت وداخلك قلبٍ على ما فات يتحسّر*** وضاقت دنيتك حتى بدت في شبه بلوره
بقيت أناظر الصورة وأنا راضي بما قدّر****إلهي وارتجي عطفه مدام إنا بمقدوره
ألا يا طفل مليته كبيرك للزمن سطـّر*****حروف ٍ ناجت الغيمة بكت وأقول ممطوره
ألا يا طفل وش حدّك تسير بدربك الأقشر******من اللي سيّر الخطوة وهي بالدرب معثورة
ألا يا طفل لو ناسي أبيك اليوم تتذكـّر***** براءة ماضي ٍ عشته طموحك لعب بالكورة
آلا يا طفل ذا ليلك يصيح (أرجوك لا تسهر)**** وأشوفك تسهره دمع ٍ بكاه الشعر بسطوره
ألا يا طفل دام إنك كبرت وخالقك أكبر**** دخيلك طالبك تكفى تعيش الطفل وشعوره
أبيك الطيش والفرحة أبيك الأجمل الأطهر*****أبيك إحساسك الماضي حياة ٍ دوم مسرورة
وربي ما نزل دمعي وجاني الشعر يتعذر****سوى من صرخة ٍ باتت بوسط الحرف مقهورة
لقيت إني أنا طفل ٍ أبيه اليوم ما يكبر***** لقيت إني أنا ( التايه ) صغير ٍ داخل الصورة