[ناصر عبيد الهواوي]

يالفطاحل يسروا لي شي من حرية=ودي اكتب ما انتجه فكري وصاغه راسي
بالله اعطوني طرف صفحة ولو عارية= والخسارة لابتب وقطعة القرطاسي
شاقني في منتداكم وردة جورية=احيت الارض الموات بخافقي وإنحاسي
ودي اجاريها ببعض ابيات في رديه=بيت وإن زادن عن العشرة تراني ناسي
يا نديبي شب نارك واحكر البرية=شب في جزل الرموث إن برد النسناسي
في مسيل ٍبين خشم الغار والرمثية=السمر والعرن قضاهن صليب الرأسي
السلاح اللي تشيله حرمته دولية=لو تجي قايد جيوش اهلكت كل الناسي
تفني العالم ولا يبقى لهم ذرية=كيف تلقى اللي تبي لو طاح بالأرماسي
شنها بسلاح ٍابيض خل بك حنية=لايجي قلبك بلا رحمة وباسك قاسي
خابرك والله ذكي دايم ونارك حية=ماتفوتك مثل هالفرصة واظنك ناسي
يوم ولمت دلتك ما قلت للنشمية=صبي القهوة بيمنى مايجيها الباسي
وكان شفٌت شفة الفنجال بين إشفية=شفه من الشفة اللي شفته بالآسي
وكلماقلبي خلص شحنه من البطرية=إشبكوا له شاحن الذكرى وزاد إعماسي
وكلما قلت إنتهيت وتنتهي هالهية=جاء الفطاحل والنداوي وإقبسوا مقباسي
الرصيد من العقل من عام فيه شوية=وهالسنة في ربعها الأول يتم إفلاسي