السلام عليكم ورحمة الله وبركاته
هذي القصيده للشااعر والراوي / ابراهيم الرديعان
يوجهها للشاعر / بـدر الحويفــي
وايضا يوجد رد بدر الحويفي على قصيدة ابراهيم الرديعان .
اولا / قصيدة الـرديعـان ..
يا راكب اللي لا مشـى ماتقـل يـاط=من سرعته خطه دواويـر وشخـوط
جديد ما حمل بـه العفـش وبسـاط=الا ولا قالـو موضـب ومخطـروط
مراتبه مخمـل والارضيـه ابسـاط=واشعار تويوتا على الخشم محطـوط
يطرب ليا منه صـرب طلعـة الغـاط=لا حس لا ونه ولا صـوت عرمـوط
ملفـاك بـدر ليـا هبـا كـل قنـاط=قبل تقهوى واجب الضيـف مليـوط
عطه الكتاب اللي كتـب بيـد خطـاط=كريم سبلأ اللي لـه القيـل مخطـوط
قل ليا ضاق صدري جبت للنار ملقاط=وسحبت للي كنهن صيغتـه بطـوط
وفصلتهن تفصيل وزودتهـن غـاط=حديدهن صافي عن لحـام وسقـوط
وشبيت نار جرمها مـن حطـب راط=احسن من الصندل ورى سبعة شطوط
جرم جزل ماهو هدب رمث شعـواط=وسويت فنجال على الكيف مضبـوط
بلكي يبـرد واهـج بالحشـا شـاط=يشبه لدافـور لـه الغـاز مضغـوط
يوم ان كل فـي حـلا نومتـه غـاط=يرقد على طوله كما السـدو ممغـوط
عيني بحاجرها تقل مـوس صفـاط=وجفنه تقول ملامسه ظفـر شبـوط
جيت الطبيب وقال لي ويش به حـاط=في داخلي عينـك دواويـر ونقـوط
وقلت هذا لها مدة شهر صابها احباط=تسهر ودمعاته تقل وصـف لاقـوط
اسبابها اللي لفّـت الـرأس بمشـاط=بالمسك والريحان والـورد ممشـوط
تقول خاطـي فيضـة ريحهـا عـاط=ريح النفل مع فايح الشيـح مخلـوط
لاهـوب دعبـول ولامحزمـه غـاط=زوله كما البـردي ليـان وشمحـوط
عين الغزال مذيـره صـوت مخبـاط=حباله اللـي ينقـل الملـح بمشـوط
بطن العسيف ان جهزت قبل الاشواط=الفوز به مضمون في تالـي الشـوط
ولا شربت البيبسي بكـوب وشفـاط=تشرب من الشوكه مطعم ومشمـوط
ولا تلبس الكرتـه تحزمـه بفـراط=تلبس لباس اول مفصـل ومخيـوط
يا بدر حاكيتـه وانـا منـه محتـاط=وخلان من غيـره مكبـل ومربـوط
هرجة لطيـف مـا يقاطعـك بغـلاط=قرض العسل مع صافي الدر مخلـوط
الذ مـن طلـع الصويلـي بمحبـاط=تـوّه مـن امـه للمشاكيـل ملقـوط
ماهومن اللي هرجتـه سلـك مغـاط=يعطي كلام وباقـي الهـرج منطـوط
ما اذكر لنا مثله على عصر الانبـاط=اللي منازلهـم ورا النيـل وأسيـوط
أقفى وكنه يضرب القلـب باسـواط=أعطان هرج وتالي الهرج مشـروط
علمي بها يابدر فـي نزلـة اشبـاط=غرب عنه موقق شمال عنـه شـوط
مدري مع اللي حدروا يمـه الشـاط=اوهم مع اللي سنـدوا يمـة الغـوط
محتاج فزعتكم ترى طحـت بـوراط=الحال نشـت كنهـا الشـن مقـروط
حالي من اسبابها بدت تقـل مخـاط=ومن قبل عرفي له مريح ومبسـوط
وصلاة ربي عد من شـاف دميـاط=على محمد عد مـن لبـس مخيـوط
وهذا الرد من قبل / بدر الحويفـي
يوم المولع واق فـي راس شمحـاط=حوّل علينا مـن جبـل طـي بمقـوط
حاذيه مـن حـب العماهيـج مخبـاط=اللـي بحبهـن للعشاشـيـق زاروط
اللـي نبـاهـن للمعالـيـق مـعـاط=ونظراتهن ترسل عباريـد ومشـوط
صبن على قلـب الرديعـان زقـلاط=ودارت به المكره على سير مشحـوط
واسند على ابيات جـزلات وانشـاط=مثل الذهب واحد وعشرين مشـروط
عملة ذهب ماهـي دنانيـر وانواط=شاعر ماهـو بالامثـال خربـوط
وسكّر على الطاروق ضبّـه وصقـاط=حيل الله اقوى كيف با احتال وانـوط
حي الجـواب اللـي محنـط تحنـاط=جا من ابراهيـم الرديعـان مصفـوط
هـدّف وتهديفـه طريقـة تشـطـاط=واللي عطاه الـراي رجّـال مضبـوط
خطط له الخطه مـن النـاس خطـاط=قصده يسـدد كـل الانفـاق ويحـوط
وافق وركز لـه قريحـه بحـرف اط=وشاور شويره واستشاره وقـال اوط
لقـط عناقـيـد القريـحـه تلـقـاط=وخلى غصون من الورق بيض وملوط
واخذت دربه على الشـوف مشـواط=عساي احوز رضاه ويكون مبسـوط
وانا معه جندي وهـو صـف ضبـاط=تحت الاوامر لو حصل ضغط ضغـوط
مـا دامهـا لعبـة حويـلا ومزقـاط=ماني مع الصاحب قصـاوي ولابـوط
مهما حصـل بيننـا مـزح واغـلاط=الحبل ماهو بين الاصحـاب ممغـوط
عنها ابتعد بعد الجزائر عـن ارهـاط=ماني مثير اسبـاب ومعقـد اخيـوط
هـذا وبارسـل للرديـعـان خـيـاط=يخيط قلب من قسى الحـب مشعـوط
العاشق اللي في بحور الهـوى غـاط=قلبه ليـان ومـن كراسيـه ممعـوط
شايب وقلبـه بالولـع سلـك مغـاط=من شـوط تيـار الغناديـر مشلـوط
وعشقه خطـاالله لا يصلـط تصـلاط=كيف الغناوي حالتـه حـال مزنـوط
مـادام لـه ملفـا ومثبـأ ومـقـلاط=عبير نجـد وعنبـر الشـام مخلـوط
يلعب على حبلين وافراش واصمـاط=كلش جديدولا بهن همـل واصفـوط
ثنتين عنده يعملـن كحـل وامشـاط=عفايفـن مالامحـن كـل شمـحـوط
لـو يسمعنـه ولعـن فيـه شخـاط=وتناوبنـه بينهـن قـرص وعـروط
قامـن عليـه وشلطـنـه تـشـلاط=ياشينهن عند الزعل موطهـن مـوط
وعيالهن معهـن بعصيـان واسـواط=حتى الصغير اللي على الديد زعطوط
يابوحمـد بالـك تـفـرط تـفـراط=اقنع برزقـك وانـت رجـال مغبـوط
خـل اهـوى للـي يفحـط تفـحـاط=يطيح مـع دربـه كفـراط وجنـوط
حذف الحصى قفوه تقل حـذف نبـاط=ومن الحيا وجهـه مجـرد ومقشـوط
اللي لا منـه شبـع بالهـوى شـاط=عشقه مع الحـارات لفـات وفحـوط
عشقه خيـال وفيـه رجّـه وخـراط=عقله نمط سيكـل مساميـر وبلـوط
لو يازنونـه مـاوزن ربـع قيـراط=مثل الذي ريشه بـه ارنـاق ونقـوط
اللـي علـى روس المراقيـب نغـاط=يطيـر ويوقـع علـى راس زربـوط
والا انت صاحب عرف راوي وفقـاط=سبـاح ببحـور العماليـق وتـغـوط
مأنته وغد تعطـى حـلاوه وشقـلاط=العرف له عنـدك مطـارات وهبـوط
بالعرف لك قيمـه وبالشعـر عمـلاط=وبالطيب منهاجك بالامجـاد مربـوط
شاعر وعندك ذوق لاشعـار الانبـاط=لا تختبرنـي مـع ملفـات وخطـوط
خل السوالف بننـا بصـط وابصـاط=العقـل كنـز وذارف الحـب ملقـوط
والناس كل لـه محيـط بـه امحـاط=المتزن واللـي مـن العقـل مفـروط
وترى الثقه بالنفس من خير الاشراط=وكلٍ حسابـه فـي سجلـه ومفقـوط
وصح لسان الشاعرين
وان شاء الله اعجبـنــّـكم هالقصيـدتيـن
ودي واحترامي للجميع