ياهاجسى خل القلم يرعف ارعاف=مع طلعة نجوم السماء المرقباتي
من بعد ماجالي على الشعر خفخاف=توسع دروبه وهن ضيقاتي
لو غاب محرافٍ يناديه محراف=حتى تحضر الشرّد الغايباتي
أختر من سمانه ولاتاخذ ضعاف=واختار للطيب من الطيباتي
ياملهمي ماجيت تسعفني اسعاف=الموقف اكبر من جبال السراتي
ماهيب عندي والله حمولٍ خفاف=وانا منصيها هل الطايلاتي
أهل البيوت اللي ترحب بمن ضاف=وأهل العلوم اللي عليها شفاتي
ذراً لمن جاها عن الضيم والحاف=عتيبه الهيلا العظام الدهاتي
الارض من دقلاتهم ترجف ارجاف=ووسومهم تهاب منها الغزاتي
من شاف ميسمهم على حم الاشعاف=عود يدور مكسبه في النجاتي
يوم السنين عجاف وايامها عجاف=مركاضهم تشبع به الجايعاتي
أهل رماحٍ علط وسيوفٍ ارهاف=وسردٍ لوقت طرادهن دارباتي
وصحونهم تملا بقعدان وخراف=اشوف واسمع وش تعد الرواتي
لا والله الآ اسرفت ياناصر اسراف=واسهرتني وانا السهر من سماتي
ياشاعرٍ لغلا المثامين صرّاف=هيضتني وايقضتني من سباتي
ابوعبيد اللي من البحر غرّاف=لا.دوروا غيره بقايا الحتاتي
وانا احسب اني للطواريق عساف=لين انكسر قافي وطول سكاتي
حاولت مير الشعر يبغي تلطاف=ومصايدات وجهد ومحايلاتي
يحتاج ختل وحوز واحيان ملقاف=تراه مثل الشرّد الذايراتي
ياخيّرٍ صادق وافي وعفّاف=وابعد من الجوزا عن الناقصاتي
مايلحقك ياشيخنا حذف حذاف=ياسالك دروب الهدى والدعاتي
ومن كتفته ظروف الاعمال بكتاف=عذره معه ياراعي الاولاتي
واسلم ودم ما طاف بالبيت طواف=وما دور المظلوم صك البراتي