[ناصر عبيد الهواوي]

الهرج مليته ولاعاد لي به=وجه الورق ذاب وغدا خاطري صلف
وعصٌبت من ردك علي اتعصيبة=ولا عاد اعود الكم ولكن بلا حِلف
اشوف من موقفك شك ٍوريبة=والقلب مما جاه صاب ابهره خُلف
اكيد ماتدري وش اكبر مصيبة=لاصرت زعل وصار بك شوق للولف
راحت ضلوعي من خفوقي حطيبة=وتلفت معاليقه من مناتله تلف
ماعاد تفرق ونته من نحيبه=تجزم يقين انه تعاقب به الشلف
انا اشهد إنه به جروح ٍعطيبة=ويطق ممابه مثل طقة البلف
بمكينة ٍفيها البساتم خريبة=وسبايك ٍتقرش على دقت السلف
ما يقلعه اسبق من اللي يجيبه=اسرع من رجوع القصايد الى الخلف
سود الليالي لاعته ما دري به=وشهب السنين بشرها دايمٍ زلف
سار ٍبليل مظلم ٍ ماسري به=مع خايع ٍ ماجاه حافر ولا ضلف
وهالحين ياكبر اجر من يعتني به=مير انت بك جفوة وانا صاير ٍ جلف