مسحت باقي صورتك مـن خيالـي=روحي عسى درب السعـادة لقيتيـه
خوذي معك ذكرى السنين الخوالـي=وخوذي معاك اجروح قلـبٍ قتلتيـه
بسلى كما يسلى من الحـب سالـي=وبتركك .. مـادام حلمـك طويتيـه
ماعدت انا اللي في شعـوره يبالـي=وش عـاد لقالـوا حبيبـك تركتيـه
يومي غلا في خافقك وانـت غالـي=كل الغلا مغليـك .. ليتـك نصفتيـه
كنت انسج الأحـلام وانتـي إقبالـي=كنت ارسمك آمال .. شـيٍ خبرتيـه
من هذّبـك مـن طبّعـك بالدلالـي=غيري تـرى والله ماحـدٍ خسرتيـه
يامـا نثـرت الدمـع ممـا جرالـي= وياما شكيت ( البُعد ) صدق وشكيتيه
يمكن نسيتـي شوقنـا والليالـي !!=عهدٍ مضى ما ينّسي لو نسيتيـه !!
رمـز المـودّة بيننـا كـان عالـي=واليوم فـي سابـع ثراهـا دفنتيـه
تركت كل ( الغيـد ) جيتـك لحالـي= بعت الجميع وتالي الوقت .. بعتيـه
قادك غرورك والدلـع .. والتعالـي= طبع الغـدر ذنـبٍ بحقـي جنيتيـه
انا رفعتك فـوق .. فـوق العلالـي= ياللأسـف صـرحٍ بنيتـه هدمتيـه
حـبّ الوفـاء مالـه بقايـا وتالـي=جسم انبرى من زايد الهم .. زدتيـه
صحيح من سوّس على الحب نالـي=دربه عدال وباخـصٍ فيـه مايتيـه
مير البلاء من صـار حبـه نكالـي=عقب الوصال اضحى على ما بغيتيه
اقسمـت انـا ماقـول يـومٍ تعالـي= نفسي عزيزة حرّمـت مـا وطيتيـه
الله يعيـن اللـي يحـبـك بـدالـي= محروم من هو بالمحبـة بليتيـه !!
روحي عسى دربك سعيـدٍ وحالـي= صغت القرار ابيـات علّـك قريتيـه