يافـهـد نفسي من الخـفـرات طـابه=يوم طحت من الهوى روحي تعيبه
في دروبٍ يـسـتـر عـيـونـي ضـبـابه=وكـل هـم الـقـلـب في شوفة حبيبه
وصرت مـثـل اللي طـرد زامي سرابه=وطحت قبل اسقي نياقي من قلـيبه
فـات عـشـر اعـوام قلبي في عذابه=سـاهـرٍ لـيـلـي مـثـل عـيـن الـرقيبه
ارتـجـي صـوت الـغـلا والا جـوابه=صــابــرٍ مـن فــوق نـيــران الـغـليبه
ولا نظرت الشمس قفو الجال غـابه=سـرت فـي لـيلي مثل سرحان ذيـبه
مـهـرفٍ تـحت الـدجى يشكي صوابه=في مـظــامــي سـهــلـةٍ ماهـي قـريـبـه
سـاريٍ لـيـلي لاجـل حـضـرة جنابه=لين يـقـرى الـفـجـر بالمسجد خطيبه
ثـم اشـوف اقـرابـهـا تـنـقـل حـرابه=ويل من يـاطـى عـلـى نـقـرة شعيبه
ان وطيت الداب طحت بـسـم نابه=والعرب تـجـفــل من الداب وتـهـيبه
وان تركت الزين وسط الكبد ذابه=ونـظـرة الـدربـيـل ماتـقــدر تـجـيـبه
لاسـقـيـت الكبد من صـافـي شرابه=ولا ركـدت بـديـرتي ربي حـسيـبه
ثـم عـادت رحـلـتي مـحـدٍ درى به=والسهر دايـم على الـعـاشق ضريبه
ثم هاض الجاش من غـيـظٍ لجى بـه=هي علاج القلب عـن جـمـرة لـهـيبه
ضــامـرٍ كــود الـقــوافــي مـايـهــابــه=يـاتـجـي لـه طــايـعــه والا غـصـيـبـه
لا عــوى بـحــروفـهـا قــوس الربابه=كـنـهـا الـسـرحــان في راس الجذيبه
ومن خـسـر ريـح المها بأول شبابـه=صعب يكسبها عـقب مابـان شـيـبـه