هب البراد وزان وقت المطاريش= واللي يبي المقناص يطوي فراشه

يا بو علي بين إعتراف وتهاميش=من مر به وقت التجاريب عاشه
إلا الردي خطو الخدوش الدراويش=إللي طموحه ينحصر في معاشه
و الا أنت لا صاروا السواطي مرابيش=حر ما يطري له على البال حاشه
يا شوق عين أم الرموش العكاريش=غيداء لزينات الغنادير باشة
هيضتني وأنا هجوسي نشانيش=وإنتابني شوق وولع وإرتباشة
برسالتك جن الطواري شوابيش=مجنون وبخبطة عصاك إبتلاشه
شرواك منوتنا قروم مداغيش=أهل سعة صدر وحلم وبشاشة
إللي بخوتهم تطال المناويش=ولا فيهم إللي يسكن الغل جاشه
حرار في خدمة بعضهم مجاهيش=وإن زل أحدهم ما أسرفوا في نقاشه
يا ما حلى لا ما تلاقوا مغابيش=والصبح توه ما تجلى غباشه
ثم أمّروا فيهم مثل قايد الجيش=حكمة وحلم وقرم مابه لياشة
ودعوا دعاهم ثم مدوا مداويش=لجيوبهم مع الفجوج إهتواشة
وجهتهم ديار سقتها المراهيش=وسمية منها الروابي هشاشة
وعلة ربيع وصاب ريضانها طيش=وصارت تموج نشوة وإنتعاشة
يا محلا فيها هداد أشقر الريش=لملايعة خرب صعيب مهاشه
والنيشنة للي ما فيهم مراميش=تفاقة كل تثير إندهاشه
لابتلوهن للجفيل المخاريش=كل لنيشانه وكيد مناشه
وبها تعين للزبيدي منابيش=غاية لواقيط هواها إنتباشه
شهر بها تمضيه من لذة العيش=مكسبك من وقت يا ما أكثر بلاشه
أخير من رفقة هل إصبر وبشويش=وهل قولة لا عاند الوقت ماشه
على مواردهم حيام معاطيش=وجو المدينة مهتويهم فلاشه
عزومهم عن المراجل هشاهيش=دائم حيارا بين صوت وشاشة
للموضة اغرتهم عقود ودناديش=يكبر سناء النيرة ويكثر فراشة