[حمود جارالله المزيني]

سبق نشرها في موقع غير هذا الموقع ..
ولاعلاقة لها بأي اسم أو حال هنا ..

يابو حمود ليا رفعت المواضيع = تكفى بعـَـضـْـهن في زواياه خلـّـه
خلـّه : به اللـّي له معانات وايضيـع = يعود له جرحه وشوقه وغلـّه
ياليت به للقلب تبديلٍ او بيع = كان اشتري للقلب قلبٍ محلّه
مادري يطيع أو يرفض القلب مايطيع = يمكن يعييّ لايبدل سجلّه
مايقبل التبديل رغم المواجيع = يبكي على ماضيه دقه وجلـّه
واهل الهوى لو شفتهم به مصاريع = اقوى من اللـّي مابهم منـْـه علـّه
للحبّ بصمه ماتقلد بتوقيع = بصمه عن البصمات له مستقلّه
شين الفراق ان صار من غير توديع = يذبح معاليق المحب ويتلّه
ليا تذكـّر يزعج من الهواميع = يحرق به خدوده وجيده يبلّه
يبكي على من طوّع النفس تطويع = رغم الأسى نفسه معي مسفهلّه
ياما قهره اهل القلوب القواطيع = اللـّي طريق المرحمه ماتدلّه
قالوا توفى الحب من دون تشييع = الحب يبقى مابه نهايةٍ له
قولوا لمرسول ( الوفا ) تهت بالريع = وعقبه نفودٍ بين شمسٍ ومـَـلـّه
اوصل سلامي .. قل : دموعه ينابيع = يطري عليّ دموع لاجلي يهلّه
الناس تبني له قصور ومشاريع = وانا له بقلبي قصورٍ مظِـلّه
اقفى وراه الطامعين الصعاصيع = ماغير قلبه روّحوا فيه كلّه
ذكراه لاهبت عليّ الذعايع = احسّ روحي شلّ كلّه تشلّه
وان جيت ابا اسلى شفت بعض المواضيع = اللـّي تذكـّر كل خلٍ بخلّه