هلا باللي يصوغ من القوافي رسمته بفنون=يركبها ينقحها يوازنها بميزانه
يعبر عن شعوره واللذي حوله بعد يلقون=تعابير(ن) تصورما لجا بقلوب شفقانه
ولاهو قاصر ابياته بوصف العاشق المفتون=رساله صادقه بهموم ناسه واقرب اخوانه
وانا اقول الشعر نعمه اذا الشاعر على القانون=بعيد(ن)عن عيوب الناس او وصف(ن)لفتّانه
يعبر بالغزل والفخر والحكمه يثير شجون=ويكتب في قضايا المجتمع بوحه وأشجانه
ترا الشاعر له قليب(ن) رهيف(ن) دايم(ن) مطعون=الى شاف الغزال الشارده تهتز أركانه
وانا ما الوم قلبك ياوسيع العرف اذا مشطون=غزال الريم سابيته الا يازين شطّانه
اذا السجان به قسوه وجلف وخاطره محقون=سجين الحب سجّانه رقيق وليّن اغصانه
ولكنّه ترا يملك أساليب وخطط ويمون=يعذب قلب من حبه بغمزة داعج اعيانه
ولكن الغريب ان المعذب لو بدا محزون=سعيد(ن)من شقا قلبه ولو زوّد بحرمانه
وانا ياصاحبي رهن الإشاره حاظر وممنون=معك جسمي وقلبي والحلال وكلّي آمانه
وابا جهّز لك الفكسار موديله بعد مضمون=سنة سته بعد ألفين ابقعد خلف سكّانه
على التنده أناتل محكمه من كل شكل ولون=خرايط دار موجه آخر الإصدار بالوانه
على الباب اليمين اقعد وصوّت بالقصيد لحون=وآمر نقطع الصحرا تسمع حس شكمانه
والى منا وصلنا حول ديرتهم نزلنا بهون=ونِقْعِد روسنا بالكيف كيفن عالين شانه
مهوب الكاس او وِقدة عظم اوشبّة الغليون=من البن اليماني حمستن ماهيب حرقانه
والى اصبحنا نصينا دار هم دار(ن) بها المزيون=نقبل راس شايبها ونسمع علمه وشانه
ونطلب ما نبي طلبة رجال(ن) مايبون الدون=على وضح النقا والدار ندخل له ببيبانه
والى منّه طلب نافي ولو يطلب بعد مليون=نزيد الكيل ونوفّي على ماينطق لسانه
ولا نرجع من ديار الغضي وانتا بعد مغبون=لزوم العقد في يدك ووعد الشيخ عنوانه