[الطائر المهاجر]

ماكل من قال الشعر صار شاعر= حتى ولو رزّته بعض القناوات
الشعر سبك وحبك حس ومشاعر= وفيه احترام الغير في كل الاوقات
واللي اشوف بهالزمن شعر عابر= وشاعر لجهله ضايعٍ في المتاهات
ينشر ويتجاهل بفعل المكابر= ما ينشره غيره من ابداع جزلات
ماهوب يتفاعل ولاهاب زاجر= يجيب عذرٍ ماصدق فيه باثبات
مدري يظنه كابرٍ من اكابر= وإن البقيه مايساوون بيزات
وانا افتهم هالنوع هذا وخابر= مهزوز في داخله من نقص في الذات
مع كثرة التطبيل من كل قاصر= اصبح يشوف انه تعدى المجرات
لا يا اخي محدٍ لفعلتك صابر= فارجع لعقلك لاوصلك انتقادات
ما ضر غيرك بالتفاعل مثابر= وكل يتفاعل معه في كل وقفات
وانته بقسم العرض شعرك تناظر=محدٍ قرب يمه ولا عنه نشدات
وان كنت شاطر غيرك اشطر فحاذر= تطفى مثل من راح في ذل وسكات
حتيش لو صورتك مع كل ناشر= وحتيش لو تدخل بذوق البنيات
شعرٍ بليا شعور لاشك داثر= ومن لا شعر بالغير لو حي قد مات
دنياك اخذ ورد ما عنك عاذر= وذكرٍ حسن يبقى اذا صاحبه فات