[الخنساء]

المشاركة الأصلية كتبت بواسطة داعي الشوق

[ قصيدة مباشرة ،، من وهج الخيآآل ]

الله يحفْظك يا بعد كل غالي = ياللي سكنت ديار ناسٍ بعيدين
شوقي عليكم زاد يا بعْد حالي = حــرّق فؤادي وشب بالقلب نارين
طيفك يخايلني و ياما طرالي = ما غاب عني يا منى الروح والعين
الله يصبرني على اللي جرالي = الله يصبرني على فراق غالين
ماعاد لي قدرة ولا لي احتمالي = على الفراق الله يساعدني ويعين
أبطيت عني والبعد عنك طالي = وانا اتحرى جيتك حينٍ وحين
أعد ساعات العمر والليالي = و أخفي جروحي عن قرايب موالين
متى يطيب الوقت و يطيب فالي = و تعم فرحتنا قصور وميادين
اللي منول كان دايم قبالي = أروي نظر عيني بشوف المحبين
مالي على فراقه بديل و بدالي = غير الدعاء له و الصبر يالمسلمين
هذا رجا قلبي وهذا منالي = اللي بشوفه يصبح الفرح فرحين
شكواي لك ياللي عليك اتكالي = يا خالق سبع السماء والاراضين
الله يرده لي و يرتاح بالي = ياللي قريتوا القافيه قولوا آمين

صح لسانك مليون ولايكفون
قصيدة جزلة ترجمت ماحسست به
لاهنت فقد ابدعت ايها الجزل
سلمت ودام حرفك