[الطائر المهاجر]

اذا من الشعر ما ترجم الاحساس وش لي به = واذا الشاعر تجاهل حسّ غيره ما يصير انسان
همـوم الـوقت تجبرنا نوضّح وش عذاريبه = وليش الناس رغم القهر تستانس على النسيان
قصيد الحب ملينـا ولـو نطرب لاسـاليبه = بعضنا صـادقٍ بالبوح يكتب شعره الحرمان
وبعضنا صفصفة هرجٍ تعـرفه من تراكيبه = يبي ينقـال شاعر كود يلقى مدحة النسوان
وقصيـد المـدح ياكثره ويكشف عن اكاذيبه = نفـاق وهلس في الغالب لتـاجر يبغي الاثمان
ابي شاعر يقـول الحق ما يجهـل مواجيبه = ولكن دوم في عقـله ولـو هو بالقهر مليان
ولا يوجّـه تهم لانسان مهما بان من عيبه = يلـوم الوقت فالشيهـان يفهم شـارة الشيهان
يوعّي الناس باخطار الزمان وسر الاعيبه = ويوقظ في النفوس الدين يشرح هجمة الصلبان
يصحّي من تورط في المخدر وانسرق جيبه= وعقلـه راح لا حـي ولاميت يعيش جنـان
يبيع العرض أو يسرق ولا يدري من صحيبه= غـدا عبـد المخـدر راضخٍ لامـره بلاعصيـان
ينبّه بنت ما تـدري بشباب صـاع والخيبه= يطـارد في بنـات الناس طعمه يغري الجوعان
واذا منه خلص منها رمـاها وتفقـد الهيبه = تصير بضـاعة للسوق أو تقضي العمر باحزان
ترى شعرٍ بلا اهـداف ولـو أعجبك ترتيبه = مصيره سلّة الاهمـال ولـو من قـاله فـلانان

.