متواضعه ارجو ان ترتقي لذائقتكم
..............
اليا طعن رمح المسا مهجة الشمس = واصفر لونه ثم سال المغيبي
صفقت بالكفين خمسٍ على خمس = وهليت دمعي لين سمعوا نحيبي
وجريت وناتي على حظي العمس = على العدو اللي من اول حبيبي
ذكراه مثل الجرح يكبر مع اللمس = ياقوة الله كيف زادت لهيبي
ياما مضينا الوقت ضحكات مع همس = في كل علمٍ سار ناخذ نصيبي
وسوالفٍ مرت غشا وقتها الرمس = وان قلت له مليت ؟ بيقول جيبي
ياقلبي اللي كان به منغمس غمس = والنصح ماطاعه من اقرب قريبي
حتى ولو ينسى عناء اليوم والامس = يمكن على ذكراه بااشق جيبي
قلب المولع بالهوا منحمس حمس = يصير عقب الصد حاله غريبي
مرات مجنونٍ غشا فكره الطمس = ومرات يتنسك ومره طبيبي
وانا نويت العمر في صفحة الهمس = بنت الفطاحل لين وقت المشيبي
ولابد ماتشرق لنا باكر الشمس = ويصرع وضوح الصبح لون المغيبي